काठमाडौँ, ८ मङ्सिर । उपत्यकाका विभिन्न पेट्रोलपम्पमा सोमबार र मङ्गलबार छापा मार्ने क्रममा १४ पेट्रोलपम्पले ग्राहकलाई कम तेल दिने यन्त्र प्रयोग गरी ठगी गरेको पाइएको छ ।
महानगरीय अपराध महाशाखाको टोलीले छापा मार्ने क्रममा सोमबार १२ र मङ्गलबार दुई पेट्रोलपम्पमा तेल कम दिने यन्त्र जोडेको अवस्थामा फेला पारी सञ्चालकलाई पक्राउ गरी कानुनी कारबाही अगाडि बढाएको आज पत्रकार सम्मेलन गरी जानकारी दिएको छ ।
महाशाखाका प्रमुख वरिष्ठ प्रहरी उपरीक्षक सर्वेन्द्र खनालका अनुसार १४ पेट्रोलपम्प सञ्चालकमध्ये सात जना सञ्चालक पक्राउ परेका छन् भने अन्य सञ्चालक फरार रहेका छन् ।
पक्राउ परेका सञ्चालकमा गायत्रीदेवी आयल स्टोर्स, एकान्तकुनाका शैलेन्द्रनाथ बादे, श्री महालक्ष्मी विश्वकर्मा ट्रेडर्स, चापागाउँका शिव तिमल्सिना, युनिक फ्युल सेन्टर, बालकुमारीका गोपाल महर्जन, त्रिशक्ति फ्युल सेन्टर, सानेपाका युनुष प्रधान, क्रिष्टल फ्युल सप्लायर्स, बालाजुका कल्याण खड्का, भक्तपुर फ्युल सेन्टरका पूण्यराम बखाडेया र न्यू बङ्गलामुखी आयल स्टोर्स, सानो भ¥याङका सीताराम घिमिरे रहेका छन् ।
राजधानी आयल, गोपीकृष्णका सञ्चालक बुद्धरत्न महर्जन र दीपक थपलिया, न्यू पुष्पाञ्जलि आयल ट्रेडर्स प्रालि, जय बागेश्वरीका सञ्चालक अमिर लामा, पूजाकोठी आयल स्टोर्स, नयाँ बसपार्कका सञ्चालक राजीव शर्मा, दिव्या सप्लायर्स, सामाखुसीका सञ्चालक तिलक श्रेष्ठ फरार रहेका छन् ।
पेट्रोलियम पदार्थ बेच्ने पम्पले तेलको मात्रा र नाप कम गर्ने उपकरण रिमोट, रिसिभर, डिभाइस, गियर, स्विच, कोड र सेफ्टी पिन जडान गरी उपभोक्ता ठग्ने गरेको अनुसन्धानको क्रममा खुलेको महाशाखाका प्रमुख खनालले बताउनुभयो ।
उनीहरुलाई पक्राउ गरी ठगी मुद्दाअन्तर्गत आवश्यक कारबाहीका लागि महानगरीय प्रहरी परिसर काठमाडौँ, भक्तपुर र ललितपुर पठाइएको प्रहरीले जनाएको छ ।
सो यन्त्र जडान गर्ने कार्यमा संलग्न चार भारतीय नागरिक र एक नेपाली नागरिकलाई समेत प्रहरीले पक्राउ गरेको छ ।
पक्राउ पर्नेमा भारत विहार, मोतिहारीका नसिम सिद्दिकी, हमिद हुसेन, मोहम्मद अबरार भारत गोरखपुरका अयुव आलम र नेपाली नागरिक रौतहट कनकपुरका शेख इम्तिहाज रहेका छन् ।
त्यसैगरी पेट्रोलियम पदार्थको कालोबजारी गर्ने सर्लाही, कालिञ्जोर गाविसका हेम विक्रम बराललाई समेत प्रहरीले फक्राउ गरेको छ ।
डिजिटल पम्पमा प्रयोग हुने उपकरण रिमोट, रिसिभर, डिभाइस, स्विच, चिप्स र कोड भारतको लखनउबाट रु २४ हजारमा खरिद गरी ल्याउने र पम्पमा ३० देखि ४० हजारमा जडान गर्दै बेच्दै आएको पक्राउ परेकाले प्रहरीलाई बयान दिएका छन् ।
मेनुयल पम्पमा प्रयोग हुने उपकरण बुस गियर, मिडल गियर, बबिल गियर, सेफ्टी पिन बजारबाट ३०० देखि ५०० मा खरिद गरी पम्पमा सात हजारदेखि १० हजारसम्ममा जडान गर्दै आएको यन्त्र बिक्री गर्नेले जानकारी दिएका छन् ।
महाशाखाका प्रमुख खनालका अनुसार ग्राहकले पाँच लिटर पेट्रोल हाल्दा २०० देखि ३०० मिलिलिटर कम दिने गर्दा १०० लिटर तेल हाल्दा तीनदेखि चार लिटर कम तेल पेट्रोलपम्पले दिने गरेको अनुसन्धानको क्रममा खुलेको छ ।
प्रहरीले अन्य पाँच पेट्रोलपम्पमा छापा हाने पनि प्रहरी आउने सूचना पाएर त्यसअघिनै सञ्चालकले ती यन्त्र निकालेकाको आशङ्कामा ती पेट्रोलपम्पबारे पनी अनुसन्धान भइरहेका महाशाखाले जनाएको छ । रासस
No comments:
Post a Comment