अख्तियारको कार्यको समीक्षा

काठमाडाँै, ९ मङ्सिर । अख्तियार दुरुपयोग अनुसन्धान आयोगले आव ०७२÷७३ को प्रथम चौमासिक अवधिमा सम्पादन गरेका कार्यको प्रगति समीक्षा गरेको छ ।

आयोगका सचिव शान्तराज सुवेदीको संयोजकत्वमा भएको उक्त समीक्षा कार्यक्रममा योजना तथा अन्तर्राष्ट्रिय सम्बन्ध महाशाखा प्रमुख कृष्णहरि पुष्करले प्रथम चौमासिक प्रगतिको प्रस्तुतीकरण गर्नुभएको थियो ।

सचिव सुवेदीले विविध व्यवधानका बाबजुद पनि आयोगको प्रथम चौमासिक अवधिमा भएका प्रगतिलाई सन्तोषजनक नै मान्नुपर्ने बताउँदै कार्यसम्पादनलाई अझ प्रभावकारी र नतिजामुखी बनाउन सम्पूर्ण कर्मचारीलाई अनुशासित, कर्तव्यनिष्ठ र नैतिकवान् भई कार्य गर्न निर्देशन दिनुभएको थियो ।

अनुसन्धान कार्यलाई प्रविधियुक्त, तथ्यपरक र वैज्ञानिक बनाउनुपर्ने कुरामा जोड दिँदै उहाँले अनुसन्धानका क्रममा प्रत्येक व्यक्तिको मानव अधिकार र व्यक्तिगत प्रतिष्ठाको समेत ख्याल गर्न निर्देशन दिनुभएको थियो । रासस