गाईघाट (उदयपुर), २७ मङ्सिर । उदयपुर जिल्लाको पहाडी गाविस रौता–१ मुर्कुचीमा स्थानीय केशरबहादुर मगरको घरमा लगाइएको रुद्री पूजाको क्रममा प्रसाद वितरण गरेर खानेक्रममा विषाक्त खानाको कारण २६ जना बिरामी परेका छन् भने अन्य चारजनाको अवस्था गम्भीर रहेको छ ।
शुक्रबार साँझ नै मगरको घरमा रुद्री पूजा लगाएर स्थानीयलाई प्रसाद वितरण गरेर खानेक्रममा २६ जनालाई विषाक्त खानाको कारण झाडापखाला सुरु भएको स्थानीय दिव्यराज खड्काले बताउनुभयो ।
तत्काल स्थानीय मुर्कुची स्वास्थ्य चौकीमा बिरामीको उपचार भएर अन्यको अवस्थामा अहिले सुधार भएपनि चारजनाको अवस्था गम्भीर रहेको कुरा अर्का स्थानीय भरत खड्काले बताउनुभयो ।
चार जनाको अवस्था अहिलेसम्म पनि बेहोस र गम्भीर रहेको कारण जिल्ला अस्पताल उदयपुरबाट स्वास्थ्यकर्मी अर्जुन मेहता र धनबहादुर कार्कीलाई त्यसतर्फ खटाइएको पनि जिल्ला जनस्वास्थ्य कार्यालय उदयपुरले बताएको छ ।
मगरको घरमा पूजाको आयोजना हुँदा सेलरोटीमा विषाक्त तत्व मिसावट भएको कारण प्रसाद खानेमध्ये धेरैजना तत्काल झाडा र पखालाबाट प्रभावित भएको स्वास्थ्य चौकी मुर्कुचीले बताएको छ ।
तेल र आँटाको पिठोमा विषालु वस्तु मिसिएको हुनसक्ने स्वास्थ्यकर्मीले बताएका छन् । मगरको घरमा स्थानीय मुर्कुची बजारको पसलबाट नै तेल र मैदा किनेर लगेर प्रसाद बनाएको कारण यस्तो भएको स्थानीयले बताएका छन् ।
स्थानीय पसलमा यस्तो विषाक्त पदार्थसहितको खाद्य पदार्थ बिक्री हुन थालेपछि अहिले सम्बन्धित पसलमा दैनिक उपभोग्य वस्तु किनेर खान खतरा हुन थालेको र स्थानीय जनता भयभित हुन थालेको अर्का स्थानीय कुमार मगरले बताउनुभयो ।
यस्ता विषाक्त वस्तु तथा म्याद नाघेको वस्तु बिक्री गर्ने पसल सञ्चालन तथा व्यापारीलाई प्रशासनले तत्काल अनुगमन गरेर कारबाही गर्नुपर्ने आवाज स्थानीयवासीले उठाएका छन् ।
समयमा नै प्रशासनले ध्यान नदिए अन्य निर्दोष उपभोक्ता पनि यस्ता विषाक्त खाद्य वस्तुको सिकार हुने अवस्था आएको स्थानीय ज्ञानबहादुर खड्काले बताउनुभयो । रासस
No comments:
Post a Comment