कावासोती, २२ मङ्सिर । भारतीय सीमामा बाँधिएका बाँधबाट प्रभावित समुदायको राष्ट्रिय कार्यशाला नवलपरासीको सुनवलमा सुरु भएको छ ।
सीमावर्ती क्षेत्रमा अन्तर्राष्ट्रिय कानुनविपरीत भारतद्वारा विभिन्न बाँध निर्माण हुँदा पीडित बनेका स्थानीय सङ्घर्ष समितिका प्रतिनिधि कार्यशालामा सहभागी भएका छन् ।
कार्यशालामा कञ्चनपुरस्थित शारदा, प्रस्तावित पञ्चेश्वर बाँध र टनकपुर बाँधपीडित रहेका छन् भने बाँकेका, लक्ष्मणपुर बाँध, कपिलवस्तुका महलीसागर बाँधपीडित, रुपन्देहीका रसिवाल खुर्दलोटन बाँधपीडित र नवलपरासीका गण्डक बाँधपीडितको सङ्घर्ष समितिका पदाधिकारी सहभागी छन् ।
भारतद्वारा एकपक्षीय रुपमा बाँध निर्माण गर्दा त्यसको असर नेपालभित्र पर्ने हुँदा ती समस्यालाई एकताबद्ध तरिकाले राष्ट्रिय र अन्तर्राष्ट्रियकरण गर्ने तयारीका लागि दुईदिने कार्यशाला आयोजना गरिएको सिँचाइ जल उपभोतmा महासङ्घका महासचिव रामलखन हरिजनले बताउनुभयो ।
कार्यशालामा बाँधका कारण खेतीपातीमा परेको असर, आर्थिक तथा समाजिक असरका कारण, बाँधले गर्ने गरेको कटान, डुबान र पटान, ती बाँधसँग सम्बन्धित सम्झौता र सन्धिको इतिहास, प्रावधान, प्रमाण, चुनौती र सम्भावनाबारे छलफल गरिने महासङ्घका महासचिव हरिजनले बताउनुभयो ।
अगामी अभियानका लागि विस्तृत कार्ययोजना, कार्यान्वयन, सञ्जाल निर्माण गरी प्रतिबद्धता घोषणासमेत जारी गरिने हरिजनले जानकारी दिनुभयो । कार्यशालामा पहिलो दिन महाकालीलगायतका सबै बाँध र तटीय अवस्थाका बारेमा छलफल भएको छ ।
अध्ययनबिना सरकारी स्तरमा सन्धि हुन्छ, त्यसको मार आमसर्वसाधारण नागरिकलाई पर्ने गरेको कार्यशालाका सहजकर्ता घनश्याम कोइरालाले बताउनुभयो । रासस
No comments:
Post a Comment