बुटवल, २० चैत । नेपाल भन्सार तथा विमानस्थल सम्बद्ध श्रमिक सङ्घ नेपालको केन्द्रीय भेला आजदेखि बुटवलमा सुरु भएको छ ।
देशभरिका श्रमिकहरुको सहभागिता रहेको दुईदिने भेलाको एक समारोहका बीच सांसद तथा नेपाली काँग्रेस रुपन्देहीका सभापति अब्दुल रज्जाकले उद्घाटन गर्नुभयो ।
कार्यक्रममा सांसद रज्जाकले हरेक क्षेत्रका मजदुरहरुको हितमा काम गर्न सकिएमात्र उनीहरुको पक्षमा न्याय हुने बताउनुभयो । उहाँले आफ्नो पार्टी परिवर्तनका पक्षमा लडेका सबै मजदुर वर्गको पक्षमा रहेको पनि स्पष्ट पार्नुभयो ।
सो अवसरमा बोल्दै सङ्घका केन्द्रीय अध्यक्ष केदारनाथ दाहालले आफ्नो संस्था समाजका सबै वर्गका मजदुरको प्रतिनिधित्वका साथ निर्माण भएको भन्दै अझै बढी सङ्गठित हुन आवश्यक रहेको बताउनुभयो ।
कार्यक्रममा नेपाली काँग्रेस रुपन्देहीका सचिव रामकृष्ण खाँण, क्षेत्रीय सभापति हरि लम्साल, नेपाल टे«ड युनियन काँग्रेस रुपन्देहीका सभापति काजीमान श्रेष्ठ, निर्माण मजदुर श्रमिक सङ्घका केन्द्रीय अध्यक्ष जेवी गुरुङ, कर्मचारी युनियनका केन्द्रीय सदस्य गणेश भण्डारी, कल्पना अधिकारी, विमलराज भट्टराई, कञ्चन विष्टलगायतले बोल्नुभएको थियो ।
भेलासँगै भोलि केन्द्रीय समितिको बैठकसमेत गरी सङ्गठनलाई अब कसरी अघि बढाउने भन्ने विषयमा गम्भीर छलफल हुने केन्द्रीय अध्यक्ष दाहालले बताउनुभयो । भेलामा देशभरिका प्रतिनिधिहरुको सहभागिता रहेको छ । रासस
No comments:
Post a Comment