बुद्धनगर वाग्मती क्षेत्रबाट १० मेट्रिक टन फोहर

काठमाडौँ, १५ जेठ । वाग्मती सफाइको १५९ औँ हप्तामा आज बुद्धनगर पुल आसपासको वाग्मती नदीमा सफाइ गरी १० मेट्रिक टन फोहर व्यवस्थापन गरिएको छ ।

सफाइमा अधिकारसम्पन्न वाग्मती सभ्यता एकीकृत विकास समिति, कामपा, नेपाल प्रहरी, सशस्त्र प्रहरी बल, उप्रेती समाज, हुमागाईँ समाज, नेपाल चलचित्र प्राविधिक सङ्घ, नेपाल विज्ञापन सङ्घ, विभिन्न विद्यालय र रेयुकाइ लगायत ३४ संस्थाका ८०० व्यक्तिको सहभागिता थियो ।
पूर्वमुख्यसचिव लीलामणि पौडेल, पूर्वसचिव किशोर थापा, पूर्वप्रमुख निर्वाचन आयुक्त नीलकण्ठ उप्रेती, उप्रेती समाजका डा रामप्रसाद उप्रेती, पूर्वप्रहरी नायब महानिरीक्षक विमला थापा, विज्ञापन सङ्घका पूर्वअध्यक्ष राजकुमार भट्टराई र कलाकार जितु नेपाल लगायतको सफाइमा सहभागिता थियो ।
सफाइमा १५० जना प्रवेशिका परीक्षा प्रिन्सेसको पनि सहभागिता रहेको वाग्मती समितिका माला खरेलले रासससलाई जानकारी दिनुभयो । सफाइका लागि ग्रिनहिल सिटी अस्पताल बसुन्धराले एम्बुलेन्स सेवा उपलब्ध गराएको थियो । आगामी शनिबार १६० औँ हप्ताको वाग्मती सफाइ पनि बुद्धनगर क्षेत्रमै गरिने समितिका सञ्चालक समिति सदस्य नारायण श्रेष्ठले बताउनुभयो ।

विसं २०७० जेठ ४ गते शनिबारदेखि काठमाडौँ उपत्यकाको सभ्यताका रुपमा रहेको वाग्मतीकोसफाइ महाअभियान सुरु गरिएको थियो । महाअभियानका रुपमा वाग्मती सफाइ हुन थालेपछि यसका सहायक नदी र देशका विभिन्न भागका नदीनाला एवम् तालतलाउ पनि सफाइ गर्ने अभियान सुरु भएको छ । रासस