समय तोकेरै चक्रपथभित्रका सडक कालोपत्र गर्न निर्देशन

काठमाडौँ, १ असार । उपप्रधान, सङ्घीय मामिला तथा स्थानीय विकासमन्त्री कमल थापाले समय तोकेरै चक्रपथभित्रका सबै सडक कालोपत्र गर्न काठमाडौँ महानगरपालिकालाई निर्देशन दिनुभएको छ ।

कार्यसम्पादन तथा विकास व्यवस्थापनका विषयमा जानकारी लिन आज महानगरपालिका कार्यालय पुग्नुभएका मन्त्री थापाले सरसफाइ, हरियाली र उज्यालो भएमात्रै काठमाडौँ राजधानी सहर जस्तो देखिने बताउनुभयो । साना योजना वडामा पठाएर एकीकृत योजना केन्द्रबाट सञ्चालन गर्न पनि उहाँले निर्देशन दिनुभयो ।

महानगरपालिकाका प्रमुख कार्यकारी अधिृकत रुद्रसिंह तामाङले महानगरको वार्षिक कार्यक्रम, सञ्चालित योजना, भूकम्पीय प्रभाव व्यवस्थापन, नागरिकका विकास चाहनालगायत विषयमा जानकारी गराउनुभएको थियो ।

“विकास व्यवस्थापनमा साझेदारको सङ्ख्या बढी र काममा दोहोरोपना भएका कारण परिणाम देखाउन पाइएन” – उपत्यकाको एकीकृत विकास प्रारुप अबको गन्तव्य हुनुपर्ने बताउँदै प्रमुख अधिकृत तामाङले भन्नुभयो ।

महानगरको भौतिक पूर्वाधार तथा निर्माण विभाग प्रमुख डा उत्तरकुमार रेग्मीले भित्री वडामा जनसहभागितामूलक कार्यक्रम सञ्चालन हुन नसकेको र तीबाहेकका वडामा जनसहभागितामा आधारित रु आठ करोड भन्दा बढीका योजना रहेको जानकारी दिनुभयो ।

सम्पदा तथा पर्यटन विकास विभागका प्रमुख अर्चना श्रेष्ठले चालु आवमा सांस्कृतिक सम्पदाको निर्माण तथा मर्मत कार्य रु ११ करोडबाट अघि बढाइएको बताउनुभयो । रासस

No related posts.