बोलेरोको ठक्कर दिँदा एक बालकको ज्यान गयो

सिन्धुली, ७ असार । बिपी राजमार्गअन्तर्गत कमलामाई नगरपालिका–९ ढुङग्रेवासमा पिकअप बोलेरोले आज साँझ ठक्कर दिँदा एक बालकको ज्यान गएको छ भने अर्का एक बालक घाइते भएका छन् ।

बोलेरोको ठक्करबाट सिन्धुलीको हतपते गाविस–६ भलुवाई निवासी १२ वर्षीय साहिभ घिमिरेको ज्यान गएको हो । घाइते बालकको उपचारका लागि काठमाडाँै लैजाँदै गर्दा चियाबारीमा पुगेपछि ज्यान गएको जिल्ला प्रहरी कार्यालय सिन्धुलीका प्रहरी नायब उपरीक्षक श्यामकुमार सारु मगरले जानकारी दिनुभयो ।

दुर्घटनामा कमलामाई नगरपालिका–९ बस्ने अन्दाजी १२ वर्षीय आयुष थापा घाइते भएको र थप उपचारका लागि काठमाडाँै पठाइएको उहाँले जानकारी दिनुभयो ।

प्रहरीका अनुसार दुवै बालक सडकमा हिँडिरहेको बेलामा बोलेरोले ठक्कर दिएको थियो । ना२च ५९२७ नंको पिकअप बोलेरो युनाइटेड ग्यारेजमा मर्मतका लागि लगेको र मर्मतपछि परीक्षणका लागि सडकमा चलाउँदा उक्त बोलेरोले दुई बालकलाई ठक्कर दिएको जिल्ला प्रहरी कार्यालय सिन्धुलीले बताएको छ ।

ग्यारेजमा काम गर्ने मिस्त्री बोहन थापामगरले बोलेरो मर्मत गरी परीक्षणका लागि चलाउँदा दुर्घटना भएको थियो । मिस्त्री बोहनलाई नियन्त्रणमा लिएर घटनाको थप अनुसन्धान भइरहेको जिल्ला प्रहरी कार्यालय सिन्धुलीले जनाएको छ । रासस

No related posts.