तीन महिलामा पाठेघरको मुखको क्यान्सर

जुम्ला, ४ भदौ । कर्णाली स्वास्थ्य विज्ञान प्रतिष्ठान जुम्लामा सञ्चालित पाठेघर सम्बन्धी निःशुल्क स्वास्थ्य शिविरमा तीन महिलामा पाठेघरको मुखको क्यान्सर भएको भेटिएको छ ।

साउन २० गतेबाट सञ्चालित शिविरमा ७८० महिलाको पाठेघरको मुखको स्क्रिनिङ गरिएको थियो । जसमा तीन महिलामा पाठेघरको मुखको क्यान्सर भएको पाइएको प्रतिष्ठान जुम्लाका मेडिकल डाइरेक्टर डा निरेश थापामगरले जानकारी दिनुभयो ।

डा थापामगरले भन्नुभयो, “क्यान्सर भएको पक्का भएपछि तीनै महिलाको उपचारका लागि चितवन भरतपुर अस्पतालमा सिफरिस गरिएको छ । तर गरिबीका कारण एकजनाले प्रतिष्ठानमै उपचार गर्न अनुरोध गरेको र अर्कोले जान मानेको अवस्था छैन ।” एकसय ४० जना महिलाले समयमै उपचार नगरे क्यान्सर रोग विकसित भएर जाने उहाँको भनाइ छ ।

कर्णालीका यति धेरै महिलामा क्यान्सरको सम्भावित खतरा देखिनुमा सानो उमेरमै विवाह गर्नु, बढी बच्चा जन्माउनु, धुवाँयुक्त घरमा बस्नु, चुरोट खानु, पोषणयुक्त खाना नखानु र यौनरोग मुख्य कारण रहेको उहाँको दाबी छ । क्यान्सर हुनुको पूर्व अवस्था पत्ता लगाइ सम्भावित खतराबाट मुक्त गराउन शिविर सञ्चालन गरे अनुसार अहिले महिलाको पाठेघरको मुखमा केमिकल प्रयोगगरी रस परीक्षण गर्ने काम भइरहेको उहाँले बताउनुभयो ।

मेडिकल डाइरेक्टर डा. थापामगरका अनुसार प्रतिष्ठान जुम्लाको आयोजनामा सञ्चालित शिविरमा इन्टरपिट क्यान्सर डाइगोनोस्टिक सेन्टर काठमाडौँले प्राविधिक सहयोग गरेको छ ।
खासगरी, यो शिविरका लागि डाइगोनोस्टिक सेन्टर काठमाडौका डा ग्रिसम श्रेष्ठको ठूलो सहयोग रहेको उहाँले जनाउनुभयो । यो सेवा डोल्पा, कालिकोट, मुगु, जुम्ला र जाजरकोटका पाठेघरको समस्या भएका रोगी महिलाले उपचारमा लगिरहेका छन् ।
शिविर यही भदौ १२ गतेसम्म सञ्चालन हुने प्रतिष्ठान शिक्षण अस्पताल जुम्लाले जनाएको छ । रासस

No related posts.