शान्ति प्रक्रियासँग बाँकी विषयले तत्काल पूर्णता पाउनेमा बान विश्वस्त

न्युयोर्क, ८ असोज । संयुक्त राष्ट्र सङ्घका महासचिव बान कि–मुनले नेपालको शान्ति प्रक्रिया र संविधान लेखनको प्रक्रियाले पूर्णता पाएकामा खुसी व्यक्त गर्दै शान्ति प्रक्रियासँग बाँकी रहेका विषयलाई समेत तत्काल पूर्णता दिएर अगाडि बढ्न नेपालका राजनीतिक दल र सरोकार भएका पक्ष सफल हुने विश्वास व्यक्त गर्नुभएको छ ।
राष्ट्र सङ्घको महासभामा नेपाली प्रतिनिधिमण्डलको नेतृत्व गर्नुभएका परराष्ट्रमन्त्री डा प्रकाशशरण महतसँगको भेटमा मुनले नेपाल समद्धिका दिशामा अगाडि बढोस् भन्ने आफ्नो सन्देश प्रधानमन्त्री पुष्पकमल दाहाललाई सुनाइदिन समेत आग्रह गर्नुभएको थियो । त्यस अवसरमा सन् २०३० सम्म दिगो विकास लक्ष्य प्राप्त गर्न नेपालले गर्न सक्ने काम तथा कारबाहीका बारेमा समेत उहाँले चासो राख्दै सफलताको शुभकामना दिनुभएको थियो ।

राष्ट्र सङ्घको मुख्यालयमा भएको भेटमा महासचिव मुनले संविधान कार्यान्वयनका अवस्थाका बारेमा राखेको जिज्ञासामा परराष्ट्रमन्त्री डा महतले सबै दलको सहमतिमा संविधान कार्यान्वयन प्रक्रियाले गति लिएको र शान्ति सम्झौताका हस्ताक्षरकर्ता नेपाली काँग्रेस र नेकपा(माओवादी केन्द्र)लगायत दल मिलेर संयुक्त सरकार गठन गरिएको बताउनुभयो ।
सिङ्गापुरले नेपालमा लगानी बढाउने
परराष्ट्रमन्त्री डा महतसँग आज भएको भेटमा उहाँका सिङ्गापुरका समकक्षी विभिन बालकिसनले आफ्नो देशले नेपालमा लगानी बढाउन चाहेको र सहयोगका विविध आयामका बारेमा दुई देश मिलेर अगाडि बढ्ने बताउनुभयो ।
राष्ट्र सङ्घको ७१ औँ महासभामा भाग लिन आउनुभएका परराष्ट्रमन्त्री डा महत र बालकिसनबीच आपसी हित र द्विपक्षीय चासोका अन्य विषयमा पनि कुराकानी भयो ।
नेपालको आज सम्बोधन
महासभामा नेपालका तर्फबाट परराष्ट्रमन्त्री डा महतले आज सम्बोधन गर्नुहुने कार्यक्रम छ । संविधान कार्यान्वयनका विषयमा प्रमुख राजनीतिक दल र मधेसकेन्द्रित दलबीचको वार्ता र संवादलाई अगाडि बढाउन समय दिनुपर्ने भएकाले प्रधानमन्त्री दाहालले अमेरिका भ्रमण स्थगन गर्नुभएको सन्दर्भमा नेपाली प्रतिनिधिमण्डलको नेताका रुपमा परराष्ट्रमन्त्री डा महतले महासभालाई आज सम्बोधन गर्नुहुने भएको हो ।

महासभालाई पाकिस्तानका प्रधानमन्त्री नवाज सरिफ, बङ्गलादेशका प्रधानमन्त्री शेख हसिनालगायतले सम्बोधन गरिसक्नुभएको छ । यस्तै उद्घाटनसत्रमा नै अमेरिकी राष्ट्रपति बाराक ओबामाले आफ्नो महत्वपूर्ण सम्बोधन गरिसक्नुभएको छ ।

नेपालका तर्फबाट डा महतले जलवायु परिवर्तन, साना र अल्पविकसित राष्ट्रका समस्या, शरणार्थी एवम्् आप्रवासनको विषयका अतिरिक्त नेपालको शान्ति प्रक्रिया, संविधान निर्माण र त्यसको कार्यान्यवनको अवस्थाका बारेमा महासभामार्फत विश्वसमुदायलाई जानकारी गराउनुहुनेछ ।

राष्ट्रसङ्घका लागि नेपालको स्थायी आवासीय प्रतिनिधि दुर्गाप्रसाद भट्टराईले नेपालका तर्फबाट आज सम्बोधन गर्ने कार्यसूची प्राप्त भएको जानकारी दिनुभयो ।

महासभामा यस पटक भारतका तर्फबाट राज्यमन्त्रीस्तरमा सहभागिता जनाइएको छ । महासभामा विशेष गरी सन् २०३० सम्म विश्व समुदाय दिगो विकासका पक्षका के कसरी अगाडि बढ्न सक्छन् भन्ने विषयलाई प्रमुख प्राथमिकतामा राखिएको छ ।

सो कार्यसूचीमा विश्व समुदायका तर्फबाट आफ्नो धारणा राख्ने क्रम जारी छ । यस्तै शरणार्थी तथा आप्रवासन, गरिबी, बेरोजगारी एवम् आतङ्कवादका विषयमा समेत छलफल केन्द्रित रहेको छ । रासस

No related posts.