मानव बेचबिखनविरूद्ध सबै सङ्गठित हुनुपर्नेमा जोड

काठमाडौँ, २४ भदौ । मानव बेचबिखन तथा ओसारपसार गम्भीर अपराध भएकाले त्यसलाई न्यूनीकरण गर्न देशभरका महिला अधिकार, मानव अधिकार र बाल अधिकारमा काम गर्ने सङ्घसंस्था सङ्गठित गर्नुपर्नेमा जोड दिइएको छ ।

संयुक्त राष्ट्रसङ्घीय बाल विकास कोष (युनिसेफ)र महिला तथा बालबालिका बेचबिखनविरुद्ध सहकर्मी समूह (एटविन) द्वारा संयुक्त रुपमा आज यहाँ आयोजित कार्यक्रममा युनिसेफका प्रतिनिधि रुद्रजित दासले बेचबिखनसम्बन्धी ऐन÷कानुन, बेचबिखन अन्त्यका उपाय, बेचबिखनको अवस्थाका बारेमा सरोकार भएकाहरुसँग अन्तक्र्रिया गरी सचेतना फैलाउनुपर्ने र त्यस्ता घटनामा संलग्नलाई कडा कारबाही गर्नुपर्नेमा जोड दिनुभयो ।

नेपाल पत्रकार महासङ्घका उपाध्यक्ष अनिता बिन्दुले सञ्चारमाध्यम तथा पत्रकारले यस किसिमका समाचार निरन्तर खोजी गर्नुपर्ने बताउनुभयो । पत्रकार विजय पौडेलले भूकम्पपछि राहत बाँड्ने नाममा अस्थायी शिविर पुगेका केही दलालले करिब १५ युवतीलाई यौन बजारमा बेचेको समाचार आएकाले यस क्षेत्रमा जोखिम रहेको विचार व्यक्त गर्नुभयो ।

दिगो विकासका लागि सञ्चारमाध्यमको परिचालन नेपालका अध्यक्ष रुपा शर्मा नेहाले मानव बेचबिखनसम्बन्धी समाचारको खोजी गर्दा आफूलाई पटक पटक ज्यान मार्ने धम्की आएको जानकारी गराउँदै यस्ता समाचारको खोजमा संलग्न सञ्चारकर्मीलाई सरकारले सुरक्षा प्रदान गर्नुपर्ने माग गर्नुभयो ।

शक्ति समूहका अध्यक्ष बालकुमारी राना, एटविनका अध्यक्ष मीना विष्ट तथा पत्रकार रामकला खड्का र चन्द्र बानियाँले मानव बेचबिखनका कार्य जघन्य अपराध भएकाले यसलाई न्यूनीकरण गर्न सरोकार भएका सङ्घसंस्था सङ्गठित भई अगाडि बढ्नुपर्ने बताउनुभयो ।

सन् २००२ मा काठमाडौँमा सम्पन्न सार्कको एघारौँ शिखर सम्मेलनबाट पारित ‘महिला तथा बालबालिका तथा बेचबिखनविरुद्धको सार्क महासन्धि, २००२’ लाई २०६३ भदौ २० गतेका दिन तत्कालीन व्यवस्थापिका–संसद्बाट अनुमोदन भएपछि सोही दिनको स्मरणमा प्रत्येक वर्ष भदौ २० गतेका दिन यो दिवस मनाइँदै आएको छ । रासस

No related posts.