कात्तिकभित्रै निर्वाचनको मिति घोषणा हुन्छ ः प्रवक्ता भुसाल

भक्तपुर, १६ असोज । नेकपा (माओवादी केन्द्र)का प्रवक्ता पम्फा भुसालले सरकारले आगामी कात्तिक महिनाभित्रै स्थानीय तहको निर्वाचनको मिति घोषणा गर्ने तयारी गरेको बताउनुभएको छ ।

रफत् सञ्चार क्लबले आज यहाँ आयोजना गरेको साक्षात्कारमा उहाँले स्थानीय तहको पुनःसंरचना इलाका तथा नगरपालिकलाई आधार मानेर कात्तिकसम्म तयारी सक्ने र कात्तिकमै स्थानीय तहको निर्वाचनको मिति घोषणाको तयारीमा तीन दलका शीर्ष नेता लागिरहेको उहाँले बताउनुभयो ।

संविधानप्रति असन्तुष्ट जनाउँदै आएका घटकको माग पूरा नगरे निर्वाचन सम्भव नहुने बताउँदै उहाँले उनीहरुको जायज माग सम्बोधन गरेर अगाडि बढ्नुपर्छ भन्नुभयो ।

प्रधानमन्त्री पुष्पकमल दाहालको भारत भ्रमणका क्रममा पञ्चशीलका आधारमा २५ बुँदे सम्झौता भएको दाबी गर्दै उहाँले यस विषयमा बिना कारण हल्ला गरिएको टिप्पणी गर्नुभयो ।

सरकारले झन्डै पाँच लाख भूकम्पपीडितलाई पहिलो किस्ताबापतको अनुदान उपलब्ध गराइसकेको र पुनःनिर्माणको अन्य कामलाई तीव्रता दिइरहेको उहाँको भनाइ थियो । रासस

No related posts.