काठमाडौँ, ५ पुस । वाणिज्य तथा आपूर्तिमन्त्री दिपक बोहोराले अनावश्यक दबाब दिएर नेपाली ग्यास उपभोक्तामा मनोवैज्ञानिक त्रास सिर्जना गरिएकोमा आपत्ति जनाउनु भएको छ ।
नेपाल एलपी ग्यास उद्योग सङ्घको १७ वार्षिकोत्सवका अवसरमा आज यहाँ आयोजित कार्यक्रममा उहाँले छलफल र वार्ताको माध्ययमबाटै सबै समस्या समाधान गर्न ग्यास व्यवसायीलाई आह्वान पनि गर्नुभयो ।
मन्त्री बोहोराले ग्यास आपूर्ति व्यवस्था चुस्त तुल्याउन र आमउपभोक्तालाई त्यसको सहज उपलब्धता सुनिश्चित गर्न सरकार प्रतिबद्ध रहेको बताउँदै उपभोक्ता हितका लागि सङ्घसँग मिलेर काम गर्न सरकार सदा तत्पर रहेको छ भन्नुभयो ।
मुनाफा आर्जनतर्फ मात्र नलागी अतिकष्ठका बेला रु १० हजार सम्म तिरेर एउटा सिलिन्डर किनेका उपभोक्तालाई बेवस्ता नगर्न आग्रह गर्दै उहाँले उद्योगहरु पनि मर्जर हुनुपर्नेमा जोड दिनुभयो ।
सांसद अनन्तप्रसाद पौडेलले ग्यास उद्योगी र उपभोक्ताहरुको हितमा संसदीय समितिले काम गर्नुपर्ने बताउँदै सैद्धान्तिक रुपमा फलामका विशाल साङ्ग्लो टुक्रयाउने हाम्रो संस्कृति व्यवहारमा परालको त्यान्द्रासमेत नभाच्ने नियतीबाट मुक्त हुनै पर्छ भन्नुभयो ।
नेपाल आयल निगमका कार्यकारी निर्देशक गोपालबहादुर खड्काले एलपी ग्यास उद्योगसँग सहकार्य गर्दै ग्यासको व्यवस्थित आपूर्तिमा निगमले सघाउने दृढता व्यक्त गर्नुभयो ।
नेपाल चेम्बर अफ कमर्सका अध्यक्ष राजेशकाजी श्रेष्ठले ग्यास आपूर्तिमा विद्यमान सिन्डिकेट अन्त्य गर्न सरकारले तत्काल आवश्यक निर्णय गनुपर्र्ने माग गर्नुभयो ।
सङ्घका अध्यक्ष शिवप्रसाद घिमिरेले अबको एक वर्षमा नेपाली ग्यास बुलेटबाटै ग्यास ढुवानी गर्न नसके आम नेपाली उपभोक्ताले दुःख पाउनेतर्फ सरकारको ध्यानाकर्षण गराउनुभयो ।
हाल मुलुकमा ५५ वटा एलपी ग्यास उद्योगले ७७ लाख सिलिन्डरमार्फत उपभोक्तालाई ग्याउ आपूर्ति गर्दै आएका छन् । विगत ४२ वर्षदेखि नेपालीले ग्यास उपभोग गर्दै आएका भए पनि एलपी ग्यास व्यवसायी सङ्गठित भएको १६ वर्ष मात्रै पूरा भएको छ । रासस
No related posts.
No comments:
Post a Comment