काठमाडौँ, ११ वैशाख । नागरिक समाजका अगुवा तथा पत्रकारले मुलुकमा व्याप्त भ्रष्टाचार अन्त्य गर्नुपर्नेमा जोड दिएका छन् ।
ट्रान्सपरेन्सी इन्टरनेशनल नेपालद्वारा यहाँ आज आयोजित ‘नेपालमा राजनीतिक भ्रष्टाचारको व्यापकता’ विषयक अन्तक्र्रियामा उनीहरुले पछिल्लोपटक राजनीतिक क्षेत्रमा सबैभन्दा बढी भ्रष्टाचार मौलाउँदै गएको हुँदा सो क्षेत्र पारदर्शी र जवाफदेही हुनुपर्ने धारणा व्यक्त गर्नुभयो ।
व्यवस्थापिका–संसद्, सुशासन तथा अनुगमन समितिका सभापति मोहनसिंह राठौरले मुलुकमा व्याप्त राजनीतिक अस्थिरताका कारण भ्रष्टाचार बढ्दै गएकाले सबैभन्दा पहिला राजनीतिक स्थिरता कायम गर्नुपर्ने आवश्यकता औल्याउनुभयो ।
पत्रकार हरिबहादुर थापाले कार्यपत्र प्रस्तुत गर्दै राजनीतिक दलका नेताले नीति नियम, कानुनमै भ्रष्टाचार गर्न मिल्नेगरी निर्माण गरेको बताउनुभयो । टिप्पणीकर्ताद्वय वरिष्ठ अधिवक्ता विश्वकान्त मैनाली र वरिष्ठ पत्रकार युवराज घिमिरेले मुलुकमा व्याप्त भ्रष्टाचार अन्त्य गरेको खण्डमा मात्र देशको विकास हुनसक्ने विचार व्यक्त गर्नुभयो ।
ट्रान्सपरेन्सी इन्टरनेशनल नेपालका अध्यक्ष हरि अर्यालले सबैभन्दा बढी राजनीतिक क्षेत्रमा नै भ्रष्टाचार भएकाले हरेक राजनीतिक दलका नेताले आफ्नो सम्पत्ति र पार्टीमा रहेका खर्च सार्वजनिक गर्नुपर्ने धारणा राख्नुभयो । रासस
No related posts.
No comments:
Post a Comment