काभ्रेपलाञ्चोकमा कोइलाको उत्पादन दोब्बर बढ्यो

बनेपा, १४ कात्तिक । काभ्रेपलाञ्चोकको दुर्गम गाविस सानोबाङ्थली गाविस–५ बाट उत्पादन भइरहेको कोइलाको उत्पादन दोब्बर वढेको छ ।

चरम इन्धन अभाव भइरहेको बेला त्यसको मागअनुसार आपूर्ति हुन नसकेको सांगास्वति कोइला उद्योगका सञ्चालक दीपकराज उप्रेतीले जानकारी दिनुभयो ।

अहिले अधिकतमरुपमा वायुपङ्खे चुल्होमा कोइलाको प्रयोगबाट खाने पकाउने काम भइरहेको छ र यसबाट ग्यासको अभाव टरेको छ उहाँले भन्नुभयो ।

उद्योगका सञ्चालक उप्रेतीले विगतमा करिव दुई ट्रक कोइला उत्पादन भएकोमा अहिले झण्डै पाँच ट्रक कोइला उत्पादन भएको बताउनुभयो ।

कोइला आन्तरिकरुपमा पनि खपत भएको छ तर धेरैजसो काठमाडौँको बजारमा निर्यात भएको उल्लेख गर्दै उहाँले कोइला अहिले प्रतिबोरा रु.२०० का दरले बिक्री गरिएको बताउनुभयो ।

बजार अझै पनि व्यवस्थित हुन सकेको छैन परम्परागत हिसाबले कोइलाको उत्पादन भएको र निश्चित बजारमा यसको बिक्री वितरण भएको छ ।

मेडेप नेपालको सहकार्यमा उत्पादन भएको कोइला उद्योगको मुख्य चुनौती बजार भएको जानकारी दिँदै उहाँले कोइला उद्योगमा सामूहिक लगानी भएको बताउनुभयो ।

विसं ०६२ सालमा साँगास्वति कोइला उत्पादन केन्द्रको रुपमा स्थापना भएको उद्योगबाट त्यहाँ रहेका साना किसिमका सात फलामे टङ््याकिबाट एकै दिनमा ६३ बोरा कोइला उत्पादन गर्न सकिने छ । उद्योगमा कच्चा पदार्थको रुपमा सल्लाको दाउरा बाहेक अन्य पातपतिङ्गर बढी प्रयोग हुने गर्छ ।

फलामको ट्याङ्की बनाएर २४ घण्टासम्म आगो बालेर कोइला उत्पादन गरिएको छ ।

एक अष्टेलियन नागरिकको सहयोगबाट सुरु भएको सो कोइला उद्योगमा अहिले करिव रु. पाँच लाखको लगानी रहेको छ ।

तेह्र जना शेयर सदस्य रहेको सो उद्योगले ब्रिकेटको पनि उत्पादन गरेको छ । यसको माग पनि कोइलाको जस्तै वढेको छ । प्रति ब्रिकेट रु. २० मा बिक्री गरिने ब्रिकेटको बजार पनि काठमाडौँ नै हो । यसबाट सन्तोषजनक आम्दानी भएको उल्लेख गर्दै उप्रेतीले कच्चा पदार्थको उत्पादन पनि स्थानीयरुपमा नै गरिएको बताउनुभयो । रासस