इन्धन अभावले जलविद्युत् आयोजनाको काम ठप्प

पाँचथर, १४ कात्तिक । इन्धन आपूर्ति सहज नहुँदा जिल्लामा निर्माणधिन जलविद्युत् आयोजनाको काम ठप्प भएको छ ।
अहिले जिल्लाको याङनाम गाविस–६ मा रहेकोे १४ दशमलव ९ मेघावाटको हेवा–‘ए’ जलविद्युत् आयोजना, २२ मेघावाटको तल्लो हेवा जलविद्युत् आयोजनाको काम ठप्प बनेको हो ।
हेवा ‘ए’ को काम अन्तिमचरणमा पुग्दा इन्धनको अभावले काम नै ठप्प हुन पुगेको आयोजना प्रमुख पुष्पज्योति ढुङ्गानाले बताउनुभयो । उहाँले भन्नुभयो, “सीमामा देखिएको अवरोधले प्रत्यक्ष रुपमा हामीलाई असर पारेको छ, लगभग काम सकिन लाग्दा इन्धन अभावले समयमै काम गर्न नसकिने भयो ।”
पाँचथर पावर कम्पनीले निर्माण गरिरहेको १४ दशमलव ९ मेगावाट क्षमताको आयोजनाको ९० प्रतिशत काम पूरा भएको आयोजना प्रमुख ढङ्गानाले जानकारी दिनुभयो । उहाँले भन्नुभयो, “२०६९ मङ्सिरदेखि निर्माण सुरु भएको आयोजनाले आउँदो मङ्सिर १ गतेदेखि बिजुली बाल्ने लक्ष्य राखेको थियो ।

आयोजनामा स्थानीय बासिन्दाको रु तीन करोड लगानी छ । त्यस्तै आयोजनामा कार्यरत कर्मचारीको रु दुई करोड र बाँकी सानीमा बैंकको नेतृत्वमा अन्यबाट ११ वटा बैंकले लगानी गरेका छन् ।
७५ प्रतिशत बैंकको ऋण र २५ प्रतिशत स्थानीय बासिन्दा र अन्य लगानीकर्ताले लगानी गरेका हुन् । आयोजनाको कामको सुरुवाती चरणमा स्थानीय बासिन्दाको अवरोध, वैशाख १२ गतेको भूकम्पले पारेको असरका कारण निर्धारित मितिभन्दा चार महिना ढिलो काम सम्पने लक्ष्यका साथ काम अघि बढ्दै थियो । गएको साउन महिनामै काम सम्पन्न गर्ने भनिए तापनि काम सम्पन्न हुन अझै थप तीन महिना लाग्ने भएको छ । रासस