राष्ट्रिय महिला बीच भलिबल सुरु

इटहरी, २ मङ्सीर । सुनसरीको इटहरीमा आजदेखि पाँचौ राष्ट्रिय पुरुष तथा चौथो राष्ट्रिय महिला बीच भलिबल प्रतियोगिता सुरु भएको छ ।
प्रतियोगितामा नेपाली सेना र शसस्त्र प्रहरीको महिला र पुरुष टिम गरी जम्मा १४ टिमको सहभागिता रहेको छ ।
प्रतियोगिताको उद्घाटन गर्दै भूमिसुधार तथा व्यवस्थामन्त्री रामकुमार सुब्बाले नेपालका जुनसुकै खेललाई पनि अन्तर्राष्ट्रियस्तरमा गौरव गर्ने हिसाबले विकास गर्न सक्नुपर्नेमा जोड दिनुभयो ।
तीन दिनसम्म चल्ने प्रतियोगिताअन्तर्गत आज भएको पहिलो चरणको पुरुषतर्फको खेलमा एपिएफका महेन्द्र श्रेष्ठ र सुरेश चौधरीले पूर्वाञ्चलका सुरज चौधरी र नविन रिजाललाई पराजित गर्दैै क्वार्टर फाइनलमा प्रवेश गरेको छ ।
यसैगरी आजै भएको दोस्रो खेलमा नेपाल आर्मीको ज्ञानेश्वर अधिकारी र भरत भण्डारीको टिमले पूर्वाञ्चलका कुशल कार्की र गोविन्द पराजुलीको टिमलाई सोझो सेटले पराजित गरेर क्वार्टर फाईनलमा प्रवेश गरेको छ ।
सो अवसरमा राष्ट्रिय खेलकुद परिषदका सदस्य सचिव केशव विष्ट तथा नेपालको पहिलो भलिबल कोच जापानी नागरिक सुन्जि यानागिता र अन्तर्राष्ट्रिय खेलाडी जयनारायण चौधरीलगायतले बोल्नुभएको थियो । रासस