पोखरा, ११ मङ्सिर । कास्कीका विभिन्न कार्यालयका प्रमुखले जिल्लाभित्रका कार्यालयमा हुने लैङ्गिक हिंसा अन्त्य गर्न सामूहिक प्रतिबद्धता व्यक्त गरेका छन् ।
लैङ्गिक हिंसाविरुद्धको १६ दिने अभियानअन्तर्गत जिल्लाभित्रका कार्यालयका प्रमुखबीच आज यहाँ आयोजित अन्तक्र्रिया कार्यक्रममा वक्ताले कार्यालयमा हुने गरेका लैङ्गिक हिंसाको क्रमलाई अन्त्य गर्न सबैको सामूहिक प्रतिबद्धता र सहयोगको आवश्यकता हुनेमा जोड दिए ।
अन्तक्र्रियामा कास्कीका स्थानीय विकास अधिकारी रामचन्द्र तिवारीले कार्यालयमा हुने कुनै पनि प्रकारका लैङ्गिक हिंसाका सम्बन्धमा पीडितले नसहेर त्यसको तत्काल सम्बन्धित निकायमा जानकारी गराउनुपर्ने बताउनुभयो ।
सबैको सकारात्मक प्रयास भएमा लैङ्गिक हिंसाको समूल अन्त्य गर्न सकिनेमा उहाँको जोड थियो ।
जिल्ला महिला तथा बालबालिका कार्यालयकी प्रमुख लक्ष्मी जिसीले लैङ्गिक हिंसाको अन्त्य गर्न सचेतना अभिवृद्धि अपरिहार्य हुने बताउनुभयो ।
जिल्ला कृषि विकास कार्यालय कास्की प्रमुख रमेश कोइरालाले लैङ्गिक हिंसा भएका अवस्थामा पीडित कर्मचारीले आफ्नो कुरा स्पष्ट राख्नुपर्नेमा जोड दिनुभयो ।
जिल्ला शिक्षा अधिकारी विष्णुप्रसाद अधिकारी, जिल्ला खानेपानी कार्यालयका प्रमुख नन्दलाल बन्जाडे, अञ्चल आयुर्वेद कार्यालयका प्रमुख सुभद्रा कार्की लगायतले पितृ सत्तात्मक रुपमा बढेको नेपाली समाजका कारण जानअन्जानमा हुनसक्ने हिंसाको अन्त्यका लागि सचेतना अपरिहार्य हुने बताउनुभयो । रासस
No comments:
Post a Comment