काठमाडाँै, ३ मङ्सिर । नेपालमा विपद् जोखिम न्यूनीकरणमा भूमि क्षेत्रका पेसाकर्मी र भौगोलिक सूचना पूर्वाधारको भूमिका विषयक तीनदिने अन्तर्राष्ट्रिय गोष्ठी हुने भएको छ ।
गोष्ठी आयोजनाका लागि गठित सचिवालयले आज यहाँ पत्रकार सम्मेलनको आयोजना गरी अन्तर्राष्ट्रिय गोष्ठी यही मङ्सिर ९ देखि ११ गतेसम्म काठमाडौँमा हुने जानकारी गराएको हो ।
सो गोष्ठीको मुख्य उद्देश्य वैशाख १२ को भूकम्पपछि भएको भौतिक क्षतिको पुनःस्थापनामा नापी पेसाकर्मी तथा नापनक्सासम्बन्धी भौगोलिक सूचना पूर्वाधारको भूमिका पहिचान गर्नु रहेको आयोजकले बताएका छन् ।
गोष्ठीका बारेमा प्रकाश पार्दै नापी विभागका उपमहानिर्देशक एवम् आयोजक समितिका अध्यक्ष गणेशराज भट्टले गोष्ठीमा प्रकोपबाट प्रभावित क्षेत्रमा पुनःस्थापना कार्यमा भए गरेका अन्तर्राष्ट्रिय अभ्यासका बारेमा ज्ञान आदानप्रदान हुने बताउनुभयो ।
नेपाल इन्स्टियुसन अफ चाटर्ड सर्भेयर्स र नेपाल रिमोट सेन्सिङ एण्ड फोटोग्रामेट्रिक सोसाइटीको मुख्य आयोजना एवम् भूमिसुधार तथा व्यवस्था मन्त्रालय, नापी विभाग र भूमि व्यवस्थापन प्रशिक्षण केन्द्रको सहआयोजनामा गोष्ठी हुन गइरहेको आयोजकले जानकारी दिएको छ ।
कार्यक्रममा विभागका महानिर्देशक मधुसुदन अधिकारी, आयोजक सल्लाहकार समितिका अध्यक्ष एवम् पूर्वसचिव बाबुराम आचार्य, नेपाल रिमोट सेन्सिङ एण्ड फोटोग्रामेट्रिक सोसाइटीका रविनकाजी शर्मा, सीमाविद् बुद्धिनारायण श्रेष्ठ, नापीविद् देवराज पौडेलले गोष्ठीका बारेमा जानकारी दिँदै गोष्ठीबाट नेपाललाई हुने लाभका बारेमा चर्चा गर्नुभएको थियो ।
गोष्ठीमा नेपाललगायत २१ देशका प्राध्यापक, अनुसन्धानकर्ता, विज्ञ, पेसाकर्मी, कर्मचारी, विद्यार्थी सर्भेयर, व्यवसायीलगायत करिब ३५० जनाको सहभागिता रहनेछ ।
गोष्ठीको आयोजनाका लागि नेदरल्याण्ड र जापान सरकारका साथै अन्य अन्तर्राष्ट्रिय सङ्घसंस्थाको आर्थिक तथा प्राविधिक सहयोग रहेको आयोजकले बताएको छ । रासस
No comments:
Post a Comment