नक्कली शैक्षिक योग्यताको प्रमाणपत्र पेस गर्नेविरुद्ध मुद्दा दायर

काठमाडौँ, ८ मङ्सिर । अख्तियार दुरुपयोग अनुसन्धान आयोगले नक्कली शैक्षिक योग्यताको प्रमाणपत्र पेस गरी सरकारी सेवा सुरु गरेको भन्दै नेपाल विद्युत् प्राधिकरण कुलेखानीका वरिष्ठ हेभी इक्विपमेन्ट अपरेटरविरुद्ध मुद्दा दायर गरेको छ ।

आयोगका अनुसार नेपाल विद्युत् प्राधिकरण कुलेखानी जलविद्युत् केन्द्र मकवानपुरका हेभी इक्विपमेन्ट अपरेटर रामशरण हटुवालले सुरु नियुक्ति प्रयोजनका लागि पेस गरेको शैक्षिक योग्यताको प्रमाणपत्र नक्कली देखिएकाले आज विशेष अदालतमा मुद्दा दायर गरिएको हो ।

हटुवालले पेस गर्नुभएको विहार विद्यालय परीक्षा समिति पटना, भारतबाट सन् १९८३ सालमा माध्यमिक तह उत्तीर्ण गरेको भनिएको शैक्षिक योग्यताको प्रमाणपत्र नक्कली एवम् झूट देखिएकाले हदैसम्मको कारबाहीको माग गर्दै मुद्दा दायर गरिएको आयोगका प्रवक्ता कृष्णहरि पुस्करले जानकारी दिनुभयो । रासस