भक्तपुर, ८ मङ्सिर । त्रिभुवन विश्वविद्यालयका उपकुलपति प्रा डा तीर्थ खनियाँले सामुदायिक विद्यालयको शैक्षिकस्तर वृद्धिका लागि सरकारले ठोस योजना ल्याउनुपर्ने बताउनुभएको छ ।
भक्तपुरको जेठो सामुदायिक विद्यालय श्रीपद्म उच्च माध्यमिक विद्यालयको ९२औँ तथा कलेजको छैटौँ वार्षिकोत्सवको उद्घाटन गर्दै प्रा डा खनियाँले नेपालको शिक्षाको विकासमा सामुदायिक विद्यालयको ठूलो योगदान रहेकाले यसको शैक्षिक स्तर वृद्धिका लागि ठोस योजना आवश्यक भएको बताउनुभयो ।
विद्यालय प्राङ्गण भक्तपुर दरबार स्क्वायरमा सम्पन्न कार्यक्रममा कुलपति खनियाँले नेपालकै पुरानो र प्रतिष्ठित विद्यालयका रुपमा रहेको श्रीपद्म उमाविलाई अझ सुधार गरेर गुणस्तरीय शिक्षाको गन्तव्य बनाउनुपर्ने र आफू उपकुलपति रहुन्जेल सामुदायिक विद्यालयलाई सहयोग गर्ने प्रतिबद्धता व्यक्त गर्नुभयो ।
वार्षिकोत्सवको अवसरमा विद्यालयका उत्कृष्ट विद्यार्थीलाई विभिन्न पुरस्कार तथा विद्यालयमा स्थापित छात्रवृत्ति वितरण गर्दै उहाँले विद्यार्थीले देशलाई आत्मनिर्भर बनाउन भूमिका खेल्नुपर्ने धारणा व्यक्त गर्नुभयो ।
कार्यक्रममा भक्तपुरका जिल्ला शिक्षा अधिकारी दिनेश श्रेष्ठले भारतीय नाकाबन्दीले समग्र शिक्षा क्षेत्रमा प्रभाव पारे पनि भक्तपुरमा भने त्यसको न्यून असर परेको उल्लेख गर्दै नाकाबन्दीका बीचमा पनि विद्यालय सञ्चालन हुनुले विद्यार्थीको पढ्न पाउने अधिकार सुनिश्चित भएको बताउनुभयो ।
श्रीपद्म कलेज व्यवस्थापन समितिका अध्यक्ष बाबुराजा जोशीको सभापतित्वमा भएको सो कार्यक्रममा प्राध्यापक एवम् शिक्षासेवी शिवप्रसाद धौभडेल, शिक्षक अभिभावक सङ्घका अध्यक्ष विवेकमान कर्माचार्य, पूर्वविद्यार्थी सङ्घका लक्ष्मण सुजखु, पद्म उमावि व्यवस्थापन समितिका अध्यक्ष अनन्तप्रसाद धौभडेल, पूर्वप्रअ विक्रम कायस्थ, समाजसेवी तिलक कायस्थलगायतले भक्तपुरको शिक्षाको विकासमा पद्म उमाविले पु¥याएको योगदानका बारेमा चर्चा गरेका थिए ।
कार्यक्रममा विद्यालय÷कलेजका प्राचार्य राम हाडाले विद्यालयको परिचयसँगै शैक्षिकसत्र २०७१÷७२ मा विद्यालयले पाएका उपलब्धिसहितको प्रतिवेदन प्रस्तुत गर्नुभएको थियो । रासस
No comments:
Post a Comment