काठमाडौँ, ३० कात्तिक । काठमाडौँ महानगरपालिकाको आर्थिक तथा प्रशासनिक गतिविधिप्रति पारदर्शिता नभएको गुनासो ९३ प्रतिशत सेवाग्राहीको छ ।
महानगरपालिकाले आज यहाँ आयोजना गरेको ‘सार्वजनिक सुनुवाइ’ मा प्रस्तुत कार्यपत्रअनुसार २२ प्रतिशत सेवाग्राहीले उजुरी, गुनासो सुन्ने अधिकारी नै नभएको भन्दै असन्तुष्टि जनाएका थिए ।
चार महिना लगाएर १५ वटा वडामा गरेको अध्ययन सार्वजनिक गर्दै अनुसन्धानकर्ता सुरेन्द्र महतोले सेवाग्राहीले वडा कार्यालयमा आफूहरुले पेस गरेको फाइल हराइरहने समस्या भएकाले ‘फाइलिङ सिस्टम’ सुरु गर्न सुझाव दिएको बताउनुभयो ।
अध्ययन अनुसार कार्यालयको वार्षिक नीति, कार्यक्रम र स्रोतका बारेमा ५० प्रतिशत सेवाग्राहीलाई राम्रो जानकारी नै छैन । कार्यालयको नागरिक बडापत्रबारे ४२ प्रतिशतलाई आंशिकमात्र जानकारी भएको पाइयो । अध्ययनमा वडा नं १, १७, १८, १९, २०, २१, २२, २३, २४, २५, २६, २७, २८, ३० र ३१ सहभागी भएका थिए ।
महानगरपालिकाका कार्यकारी अधिकृत रुद्रसिंह तामाङले महानगरपालिका र वडाबीच निकायगत समन्वयको अभावका कारण सेवाग्राही समस्यामा परेको बताउनुभयो ।
कार्यक्रममा सहभागीले राजस्व बढी तर सेवा कम भएको र सरसफाइ नभएका विषयमा प्रश्नहरु राखेका थिए । रासस
No comments:
Post a Comment