हत्या अभियुक्त सोह्र वर्षपछि पक्राउ

त्रिशूली (नुवाकोट), ३० कात्तिक । सोह्र वर्षअघि आफ्नै गाविसका एक व्यक्तिको हत्या गरेर फरार रहेका अभियुक्तलाई प्रहरीले गए राति पक्राउ गरेको छ ।
घ्याङ्फेदी–८ का छेवाङ तामाङलाई खुकुरी प्रहर गरी हत्या गरेर फरार भएका सोही गाविस वडा नं ३ का हर्कबहादुर तामाङलाई प्रहरीले गए राति पक्राउ गरी कर्तव्यज्यान मुद्दामा अनुसन्धान सुरु गरेको प्रहरी नायब उपरीक्षक सिद्धिविक्रम शाहले जानकारी दिनुभयो ।
विसं २०५७ माघ १६ गते घेवापूजामा मदिरा सेवन गरी झगडा पर्दा हर्कबहादुरले छेवाङलाई धारिलो हतियार प्रयोग गरी हत्या गरेको प्रहरीले आरोप लगाएको छ । सो घटनामा संलग्न अन्य दुई जना अझै फरार रहेको बताइएको छ । रासस