काठमाडौँ, ३ मङ्सिर । विपद्जन्य फोहरको व्यवस्थापनका लागि आवश्यक नीति नियम र दीर्घकालीन रणनीतिको आवश्यकता औँल्याइएको छ ।
सङ्घीय मामिला तथा स्थानीय विकास मन्त्रालय र लीड नेपालले संयुक्त रूपमा यहाँ आज आयोजना गरेको ‘विपद्जन्य फोहर व्यवस्थापन, आवश्यक नीति’ विषयक राष्ट्रिय कार्यशाला गोष्ठीमा प्रा डा. रेजीना मास्केले मुलुकले समय समयमा ठूला विपद्को सामना गर्नुपरेकाले विपद्पछि निस्कने विभिन्न किसिमका फोहरको शीघ्र र वातावरणमैत्री व्यवस्थापन गर्नका लागि आवश्यक नीति निर्माण गर्न आवश्यक रहेको बताउनुभयो ।
विज्ञान तथा वातावरण मन्त्रालयका सचिव डा कृष्णचन्द्र पोखरेलले विपद्मा निस्कने फोहर व्यवस्थापनका लागि नीति तथा नियमको निर्माण गर्दा सरकारको मात्र मुख ताक्ने नभई विभिन्न सङ्घसंस्थाले गर्नसक्ने कामको बाँडफाड गरी नीति बनाउनुपर्ने धारणा व्यक्त गर्नुभयो ।
उहाँले गत वैशाखमा गएको भूकम्पका कारण संरचना भत्किँदा निस्केको फोहर व्यवस्थापनको लागि प्राविधिक दृष्टिकोणले सम्भव हुनेलाई पुनः प्रयोग गर्ने र भग्नावशेषको उचित व्यवस्थापन गर्नु अहिलेको आवश्यकता रहेको बताउनुभयो ।
कार्यक्रम संयोजक डा सुमित्रा अमात्यले विपद्को समयमा निस्केका विभिन्न किसिमको फोहरलाई समयमानै व्यवस्थापन गर्न नसके त्यसले मानव स्वास्थ्य तथा समग्र वातावरणमानै असर पर्ने भएको हुँदा व्यवस्थापनमा ध्यान दिनु चुनौतीपूर्ण हो भन्नुभयो ।
भूकम्पका कारण सबैभन्दा बढी प्रभावित १४ जिल्लाबाट मात्र ४० लाख टन फोहर निस्केको छ । यसको वातावरणमैत्री व्यवस्थापन गर्नु अहिलेको आवश्यकता रहेको डा अमात्यको भनाइ छ ।
कार्यक्रममा सहभागीले आपत्कालीन अवस्थामा निस्केका फोहर व्यवस्थापनका लागि पुनः प्रयोग गर्न मिल्ने सामग्रीलाई पुनः प्रयोग गर्ने तरिकाको लागि आम समुदायमा जनचेतना जगाउनु पनि आवश्यक रहेको बताएका छन् । रासस
No comments:
Post a Comment