‘राष्ट्रिय राजनीतिमा विश्वेश्वरप्रसाद कोइराला’ लोकार्पित

काठमाडौँ, १६ पुस । राष्ट्रिय राजनीतिमा जननायक बिपी कोइरालाका सान्दर्भिक विचारलाई नेताहरुले बिर्सदै गएको प्रति चिन्ता व्यक्त गर्दै ती विचारको पुनः मूल्याङ्कन हुर्नुपर्नेमा जोड दिइएको छ ।

चालिसौँ राष्ट्रिय एकता तथा मेलमिलाप दिवसका अवसरमा बिपी विचार राष्ट्रिय समाजले आज यहाँ आयोजना गरेको ‘राष्ट्रिय जीवनमा विश्वेश्वरप्रसाद कोइराला’विषयको पुस्तक लोकार्पण समारोहमा सहभागी वक्ताले सो कुरामा जोड दिएका हुन् ।

पूर्व राष्ट्रपति डा रामवरण यादवले सो पुस्तक लोकार्पण गर्दै भन्नुभयो– “राष्ट्र, राष्ट्रियता र लोकतन्त्रको जगेर्नाका लागि बिपीले अपनाएको बाटो आज पनि उत्तिकै सान्दर्भिक भएकाले तिनको अनुसरण गरिनुपर्छ ।” राजनीतिक दलभित्रको खिचातानी, हतियारको राजनीति र दरबारिया खेलका कारण लोकतन्त्रलाई संस्थागत गर्न छ दशक लागेको उल्लेख गर्दै उहाँले लोकतन्त्रलाई आत्मसात् गर्न नसकेकैले राजसंस्थाको पनि अन्त्य हुन पुगेको हो भन्नुभयो ।

सर्वमान्य नेता गणेशमान सिंहले आन्दोलनरत शक्तिलाई एकै ठाउँमा ल्याउन र पूर्वप्रधानमन्त्री गिरिजाप्रसाद कोइरालाले हतियारधारी समूहलाई हतियार त्याग गर्न लगाएर राष्ट्रिय राजनीतिमा ल्याउन सफल भएको सम्झना गर्दै डा यादवले आफूले पनि सैनिकको अवकाश, संविधानसभाको विघटन र अर्को संविधानसभाको निर्वाचनका सन्दर्भमा सही बाटो अवलम्बन गर्न सक्दो प्रयास गरे पनि सफल हुन नसकेको गुनासो गर्नुभयो ।

राष्ट्रिय एकताका लागि आन्दोलनरत सबै समूहलाई एकै ठाउँमा ल्याउन संविधानसभा र तत्कालीन सरकारलाई आफूले सातबुँदे प्रस्ताव गरे पनि नसुनेको उहाँको भनाइ थियो ।

आयोजक संस्थाका उपसभापति गोविन्दराज जोशीले बिपी स्मृति तथा राष्ट्रिय मेलमिलाप दिवस मनाउन छाडेको नेपाली काँग्रेसले बिपीका विचारलाई पनि आत्मसात् गर्न नसकेकै कारण पार्टीको स्थिति खस्कँदै गएको हो भन्नुभयो ।

काठमाडौँ विश्वविद्यालयका पूर्वउपकुलपति प्रा डा सुरेशराज शर्माले राणा शासन र राजसंस्थाविरुद्ध अहिसांत्मक क्रान्ति गरेका बिपीमा राजनेतामा हुनुपर्ने यथेष्ट गुण भएको बताउनुभयो ।

लोकार्पित सो पुस्तकमा कोइरालाका ‘राष्ट्रियताको आधार’ र ‘अन्तिम सन्देश’ नामक लेख समावेश गरिनाका साथै ‘राष्ट्रिय जीवनमा विश्वेश्वरप्रसाद कोइराला’सम्बन्धी निबन्ध प्रतियोगितामा उत्कृष्ट छ निबन्ध समावेश छ ।

प्रतियोगितामा रामप्रसाद पन्तको ‘बिपी सङ्घर्षको अर्को रुप हो’, विश्वराज ढुङ्गानाको ‘लोकतन्त्रका महानायक बिपी कोइराला’, शिरीषबल्लभ प्रधानको ‘बिपी एक अन्तर्राष्ट्रिय व्यक्तित्व’, डा गोविन्दमानसिंह कार्कीको ‘व्यक्ति एक व्यक्तित्व अनेकः बिपी कोइराला’, डा नारायण चालिसेको ‘नेपाली राजनीति र साहित्यका शिखरपुरुष बिपी कोइराला’ र माधवहरि पौडेलको ‘राष्ट्रिय जीवनका महत्वपूर्ण आधारस्तम्भः बिपी कोइराला’ले क्रमशः प्रथमदेखि छैटौँ स्थान प्राप्त गरेका थिए । रासस