काठमाडौँ, ८ पुस । एकीकृत नेकपा (माओवादी) अध्यक्ष पुष्पकमल दाहालले गौतमबुद्ध र बुद्धको जन्मस्थान लुम्बिनीबारे विश्वका केही मुलुकका पाठ्य सामग्रीमा भएका भ्रामक जानकारी सच्याउन सरकार र आफ्नो पार्टीका तर्फबाट सकारात्मक सहयोगको प्रतिबद्धता व्यक्त गर्नुभएको छ ।
आज पार्टी केन्द्रीय कार्यालयमा लुम्बिनी–कपिलवस्तु दिवस विश्व अभियानको ज्ञापनपत्र बुझ्दै अध्यक्ष दाहालले अभियानका तर्फबाट अहिलेसम्म भइआएका गतिविधिको प्रशंसासमेत गर्नुभयो ।
सो अवसरमा अभियानका विश्व संयोजक रामकुमार श्रेष्ठले स्थापनाको सात वर्षयता अभियानले गौतमबुद्ध र बुद्धको जन्मस्थान लुम्बिनीको प्रवद्र्धनका लागि गरेका विभिन्न गतिविधि, उपलब्धि र भावी कार्यक्रमबारे दाहाललाई जानकारी गराउनुभएको थियो ।
श्रेष्ठले भगवान् गौतमबुद्ध र लुम्बिनीबारे स्विडेनका पाठ्यपुस्तकमा भएका गलत सन्दर्भ अभियानकै अग्रसरतामा सच्चाइसकिएको र दक्षिण कोरिया, बेलायत, नेदरल्यान्ड्स, श्रीलङ्का, सयुंक्त राज्य अमेरिका, जापान, थाइल्यान्डलगायतका देशका पुस्तकमा भएका गलत विवरण सच्याउन प्रयासरत रहेको जानकारी दिनुभयो ।
भेटघाटमा संयोजक श्रेष्ठले यस्ता संवेदनशील विषयमा सरकारी तवरबाटै प्रभावकारी भूमिकाको अपेक्षा गर्नुभयो ।
यसअघि अभियानले उपराष्ट्रपति नन्दबहादुर पुन तथा विभिन्न राजनीतिक दलका शीर्ष नेतृत्वलाई भेटेर आफ्ना क्रियाकलापको जानकारी गराइसकेको छ । रासस
No comments:
Post a Comment