सेभेन ए साइड फुटबलको उपाधि सिद्धगुफालाई

दमौली, १५ पुस । तनहुँकै ठूलो राशिको जिल्लास्तरीय सेभेन ए साइड फुटबल प्रतियोगिताको उपाधि सिद्धगुफा युवा क्लब विमलनगरले हात पारेको छ ।

दमौलीको खेल मैदानमा आज भएको फाइनल खेलमा सिद्धगुफाले आयोजक काहुँ मिलन युवा क्लब झापुटारलाई ट्र«ाइब्रेकरमा ३–१ गोलले पराजित गर्दै उपाधि हात पारेको हो ।

प्रतियोगिताको निर्धारित समयमा दुवै टिमबाट २–२ गोल भएपछि ट्र«ाइब्रेकरको माध्यमबाट खेलको निर्णय लिइएको हो । सिद्धगुफाका तर्फबाट विप्पल श्रेष्ठ र सन्दिप रानामगर तथा काहुँ मिलन युवा क्लबका तर्फबाट सुनिल थापा र अनिल सारुले गोल गरेका थिए ।

प्रतियोगितामा विजेता सिद्धगुफा र उपविजेता काहुँ मिलनका खेलाडीलाई क्रमशः रु एक लाख ११ हजार १११ र रु ५५ हजार ५५५ नगदका साथै मेडल, ट्रफी र प्रमाणपत्र प्रमुख जिल्ला अधिकारी महादेव पन्थ र काहुँ गविसका सचिव रामचन्द्र पण्डितले संयुक्त रुपमा पुरस्कार वितरण गर्नुभएको थियो ।

प्रतियोगितामा ग्यालेक्सी युवा क्लबका हिकमान दुरा उत्कृष्ट खेलाडी घोषित भई नगद रु तीन हजार र सिद्धगुफाका सन्दिप रानामगर सर्वाधिक गोलकर्ता घोषित भई रु पाँच हजार नगद हात पारेको क्लबका अध्यक्ष श्रीबहादुर आलेले बताउनुभयो । प्रतियोगितामा २४ वटा टिमको सहभागिता रहेको थियो । रासस