उडानमा नकरात्मक असर

काठमाडौँ, १६ पुस । भूकम्प र नाकाबन्दीका कारण नेपालको उडान क्षेत्रमा नकरात्मक असर देखिएको छ ।

भूकम्प र नाकाबन्दीका कारण आन्तारिक हवाई उडानतर्फ त्रिभुवन अन्तर्राष्ट्रिय विमानस्थलमा यो वर्षको पहिलो १० महिनामा सन् २०१४ को सोही अवधिको तुलनामा हवाई यात्रु आवागमनमा ४.२५ प्रतिशतले ह्रास आएको छ ।

नेपाल नागरिक उड्डयन प्राधिकरणको १७औँ वार्षिकोत्सका अवसरमा आज यहाँ आयोजना गरिएको कार्यक्रममा संस्कृति, पर्यटन तथा नागरिक उड्डयन सचिव दिनेशकुमार थपलियाले स्वस्थ र अन्तर्राष्ट्रिय प्रतिस्पर्धात्मक खालको सेवा दिन सम्पूर्ण उडान क्षेत्रका कर्मचारी लाग्नुपर्नेमा जोड दिनुभयो । विश्वका अन्य समकक्षी विमानस्थल जतिकै बनाउनका लागि लागिपर्नु पर्ने र निर्माण गरेको भोलिपल्ट नै पुनःनिर्माण गर्नुपर्ने अवस्था किन आउँछ भन्ने बारेमा समेत मूल्याङ्कन गर्नुपर्ने उहाँको भनाइ छ ।

प्राधिकरणका महानिर्देशक सञ्जीव गौतम र वायुसेवा सञ्चालक सङ्घका प्रथम उपाध्यक्ष पवित्रकुमार कार्कीले भूकम्प र नाकाबन्दीको समस्यामा पनि सेवाग्राहीलाई सक्दो सेवा पु¥याउने प्रयास गरिरहेको धारणा राख्नुभएको थियो ।

यसैबीच नेपालले हालै न्यूजील्यान्ड र भियतनामसँग द्वीपक्षीय हवाई सेवा सम्झौता गरेको छ । योसँगै नेपालले द्वीपक्षीय हवाई सेवा सम्झौता तथा समझदारी गरेका मुलुकको सङ्ख्या ३८ पुगेको छ । अहिले त्रिभुवन अन्तर्राष्ट्रिय विमानस्थलबाट दुईवटा स्वदेशी तथा २४ वटा विदेशी वायुसेवा गरी कूल २६ वटा अन्तर्राष्ट्रिय वायुसेवाले १३ मुलुकका २३ गन्तव्यस्थलमा उडान सञ्चालन गरिरहेका छन् । नेपाली वायुसेवाबाट विभिन्न छ मुलुकका आठवटा गन्तव्यस्थलमा उडान भर्दैआएका छन् । रासस