बनेपा, १६ माघ । प्रधानमन्त्री केपी शर्मा ओलीले आगामी फागुन १२ गतेदेखि पुनःनिर्माणको काम अघि बढ्ने बताउनुभएको छ ।
काभ्रेपलाञ्चोकको पाँचखाल नगरपालिका–१६ मा रहेको धुर्मुस सुन्तली एकीकृत बस्तीको निरीक्षणपछि पत्रकारहरुसँग कुरा गर्दै उहाँले भूकम्पबाट क्षतिग्रस्त स्थानलाई प्राथमिकतामा राखेर दुर्गम गाविसबाट चाँडै पुनःनिर्माणको प्रक्रिया सुरु हुन्छ भन्नुभयो ।
पुनःनिर्माणको काम तीन चरणमा गरिने बताउँदै प्र्रधानमन्त्री ओलीले भन्नुभयो ‘‘वर्षायामअघि नै पुनःनिर्माणको काम सुरु हुनेछ । पुनःनिर्माणको काम सबै पूरा नभए पनि प्राथमिकताका आधारमा काम अघि बढाइनेछ ।’’
पुनःनिर्माणको काम गर्न अब कुनै समस्या छैन भन्नुहुँदै उहाँले अहिले कानुन पनि बनिसकेको र पुनःनिर्माण प्राधिकरण पनि गठन भएकाले अब तीब्र गतिमा काम अघि बढ्ने उल्लेख गर्नुभयो ।
प्र्रधानमन्त्री ओलीले सीमा नाकामा भएको नाकाबन्दी हट्ने कुरा लगभग अन्तिम बिन्दुमा पुगेको उल्लेख गर्दै नाकाबन्दी पनि हट्ने र आफूले छिटै भारत भ्रमण पनि गर्ने बताउनुभयो ।
सो अवसरमा कलाकारद्वय सीताराम कट्टेल (धुर्मुस) र कुञ्जना घिमिरे (सुन्तली)ले बस्ती बसाल्नुको उद्देश्यसहित निर्माण प्रक्रियाका बारेमा जानकारी गराउनुभएको थियो ।
सो अवसरमा बस्ती बसालेको क्षेत्रको जग्गा गुठीको भएकाले पहरी समुदायको नाममा गराउन माग गर्दै प्रधानमन्त्री ओलीलाई स्थानीयवासीले ज्ञापनपत्रसमेत बुझाएका थिए । बस्तीमा विभिन्न सुविधासहितको १८ घर रहेका छन् ।
प्रधानमन्त्री ओली आज नै पाँचखालमा आयोजना भएको नेकपा (एमाले)को चियापान कार्यक्रम र काठमाडौँ विश्वविद्यालयले आयोजना गरेको दुई छुट्टाछुट्टै कार्यक्रममा सहभागी हुनुभएको थियो । रासस
No comments:
Post a Comment