भैरहवा, १७ माघ । श्रम तथा रोजगार र वाणिज्यमन्त्री दीपक बोहराले भारतसँग ६५ देखि ७० प्रतिशतसम्म व्यापार घाटा भएको बताउनुभएको छ ।
लुम्बिनी प्रेस क्लब भैरहवाले आज आयोजना गरेको पत्रकार भेटघाटमा उहाँले भारतसँग धेरै परनिर्भर भएकै कारण अत्यधिक व्यापार घाटा भएको बताउनुभएको हो । मन्त्री बोहराले हाल भइरहेको व्यापार घाटा न्यूनीकरणका लागि प्रधानमन्त्री केपी ओलीको भारत भ्रमणका क्रममा छलफल हुने बताउनुभयो । वैकल्पिक बन्दरगाहका रुपमा भारतको विशाखापटनमलाई व्यवस्थित गरिन लागेको समेत उहाँले जानकारी दिनुभयो ।
विभिन्न देशसँग श्रम सम्झौता भएको र पहिलो चरणमा इजरायलसित सम्झौता भएअनुसार ६० जना केयर गिभरका रुपमा त्यहाँ जान थालेको उहाँले बताउनुभयो । मन्त्री बोहराले विभिन्न युरोपेली देश, साउदी अरेबिया, मलेसियासँग रोजगारको सुरक्षित गन्तव्यका रुपमा सरकारले सम्झौता गर्न लागेको बताउनुभयो ।
रुपन्देही क्षेत्र नम्बर २ बाट निर्वाचित सांसदसमेत रहनुभएका बोहराले जिल्लाको विकासका लागि निर्माणाधीन भैरहवाको गौतमबुद्ध अन्तर्राष्ट्रिय विमानस्थलको काम छिटो सम्पन्न गर्ने, भैरहवा बुटवलमा निर्माणाधीन व्यापारिक मार्गको आयोजनालाई तत्काल पूरा गर्ने, भैरहवालाई सुन्दर तथा पर्यटकीय व्यापारिक सहरका रुपमा विकास गर्न भूमिका खेलिरहेको बताउनुभयो । रासस
No comments:
Post a Comment