नयाँ संविधान ऐतिहासिक उपलब्धि : नेता खनाल

विराटनगर, १८ पुस । नेकपा (एमाले) का वरिष्ठ नेता एवम् पूर्वप्रधानमन्त्री झलनाथ खनालले मुलुकको संविधान नेपाली समाजको विकासको निम्ति ऐतिहासिक उपलब्धि रहेको बताउनुभएको छ ।

नेकपा (एमाले)को कोसी अञ्चलस्तरीय कार्यकर्ता भेलालाई आज विराटनगरमा सम्बोधन गर्दै उहाँले संविधान गतिशील दस्तावेज रहेको र जनताको मागअनुरुप संशोधन हुने प्रावधान रहेको स्पष्ट पार्नुभयो ।

उहाँले नेपाल र भारतका जनताबीच प्रगाढ सम्बन्ध रहेको चर्चा गर्दै वरिष्ठ नेता खनालले अघोषित नाकाबन्दीका कारण नेपालीको जनजीवन कष्टकर भएको बताउनुभयो ।

नब्बे प्रतिशत सभासद्को हस्ताक्षरबाट जारी संविधानमाथि गर्व गर्नुपर्ने उल्लेख गर्दै नेता खनालले यो संविधान समाजवाद उन्मुख रहेको पनि स्पष्ट पार्नुभयो ।

“मुलुक लोकतान्त्रिक गणतन्त्रमा रुपान्तरित भइसकेकाले यसलाई सुदृढ पार्नलाई हामी सवैले ऐक्यबद्ध भएर गाउँ–गाउँमा लोकतन्त्रको सन्देश पु¥याउनुपर्ने आवश्यकता छ”– नेता खनालले भन्नुभयो ।

मधेसमा भ्रम फैलाइयोः नेता नेपाल

पूर्वप्रधानमन्त्री एवम् नेता माधवकुमार नेपालले संविधानको विषयमा मधेसमा भ्रम फैलाइएकाले भ्रमलाई चिर्न र संविधानमा प्राप्त अधिकारको विषयमा जनतालाई सचेत पार्न कार्यकर्तालाई गाउँगाउँमा पुग्न सुझाव दिनुभयो ।

मधेसीको छोराछोरीले जागिर नपाउने, राष्ट्रपति र प्रधानमन्त्री बन्न नपाउने भन्ने जस्ता भ्रामक प्रचार गरिएको चर्चा गर्दै नेता नेपालले संविधानमा सवैलाई समान अधिकार प्रदान गरिएको बताउनुभयो ।

संविधानमा मधेसी, दलित, महिला, थारु, मुस्लिमलगायतलाई विशेष अधिकार दिएको स्पष्ट पार्दै नेता नेपालले संविधानको विषयमा कसैलाई प्रश्न उठाउने ठाउँ नरहेको बताउनुभयो ।

उहाँले १६५ संसदीय क्षेत्रमध्ये ८० वटा संसदीय क्षेत्र तराईमा परेको भएपनि जनसङ्ख्याको आधारमा नभएको मधेसी मोर्चाको भनाइ गलत रहेको चर्चा गर्दै समानुपातिक र जनसङ्ख्याको आधारमा निर्वाचन क्षेत्र निर्धारणका लागि संसदमा संशोधन विधेयक पारित हुने विश्वास व्यक्त गर्नुभयो ।

सीमाङ्कनको विषयमा राजनीतिक सहमतिको आधारमा आयोग बनाएर तीन महिनाभित्र समाधान गर्नसकिने सुझाव दिँदै उहाँले मधेसका नाममा जनतालाई सताउन र दुःख दिन नहुने उल्लेख गर्नुभयो ।

नेकपा (एमाले)का स्थायी समिति सदस्य शङकर पोखरेलले संविधान कार्यान्वयनको चूनौतीको सामना गर्न पार्टी तयार रहेको चर्चा गर्दै मुलुकको भविष्य बनाउने जिम्मेवारी एमालेको काँधमा रहेको बताउनुभयो ।

कार्यक्रममा नेकपा (एमाले) कोसी अञ्चल इन्चार्ज जीवन घिमिरे, केन्द्रीय सदस्य महमुद अन्सारी, मेची अञ्चल इन्चार्ज हिक्मत कार्की तथा सगरमाथा अञ्चल इन्चार्ज जगन्नाथ खतिवडालगायतले बोल्नुभएको थियो । रासस