काँग्रेसमा समझदारीको सन्देश दिन सम्मान गरिने

काठमाडौँ, १६ फागुन । नेपाली काँग्रेसका सबै नेता १३औँ महाधिवेशनमा समझदारीका साथ अघि बढ्नुपर्छ भन्ने सन्देश दिन मङ्गलबार राजधानीमा जिल्ला एवम् क्षेत्रीय सभापतिको सम्मान एवम् बिदाई कार्यक्रम गरिने भएको छ ।

नेका जिल्ला कार्यसमिति सिन्धुपाल्चोकको आयोजनामा राष्ट्रिय सभागृहमा ७५ जिल्लाका पूर्वसभापति, २४० निर्वाचनका क्षेत्रीय सभापतिको बिदाई र नवनिर्वाचित सभापतिको स्वागत कार्यक्रम आयोजना गरिएको आज यहाँ आयोजित पत्रकार सम्मेलनमा जानकारी दिइयो ।

कार्यक्रममा जिल्ला सभापति एवम् सांसद मोहनबहादुर बस्नेतले राष्ट्रिय राजनीतिमा सहमति, सहकार्य र एकताको सन्देश प्रवाह गर्न दलभित्र पूर्ण समझदारीको विकास गर्न कावा सभापति रामचन्द्र पौडेलको प्रमुख आतिथ्यमा सम्मान कार्यक्रम गर्न लागिएको बताउनुभयो ।

“कार्यक्रमका लागि वरिष्ठ नेता शेरबहादुर देउवा, पार्टी पदाधिकारी एवम् केन्द्रीय सदस्य, पार्टीका तर्फबाट निर्वाचित सांसद, जिल्ला सभापति, पूर्व जिल्ला सभापति र क्षेत्रीय सभापतिलाई निमन्त्रणा गरिएको छ”–उहाँले भन्नुभयो । रासस