काठमाडौँ, १५ फागुन । नेकपा (क्रान्तिकारी माओवादी)का नेता सिपी गजुरेलले लेख्नुभएको ‘क्रान्ति र प्रतिक्रान्तिका शृङ्खला’ पुस्तक माओवादी अध्यक्ष मोहन वैद्यले आज विमोचन गर्नुभएको छ ।
सो अवसरमा अध्यक्ष वैद्यले विभिन्न आन्दोलनका घटनाक्रममा स्वयम् सहभागी हुँदै आउनुभएका लेखक गजुरेलको विचार, अनुभव र अनुभूतिले पुस्तक समृद्ध रहेको बताउनुभयो । उहाँले जनयुद्धकाल र शान्ति प्रक्रियामा आएयता नेपाली राजनीतिमा भएका सजीव घटनाको राम्रो विवेचना पुस्तकमा गरिएको बताउँदै लेखनलाई निरन्तरता दिन आग्रह गर्नुभयो ।
अर्काे एक प्रसङ्गमा अध्यक्ष वैद्यले अहिलेको संविधानले अझै जनता अधिकारसम्पन्न हुन नसकेको जिकिर गर्दै आन्दोलनलाई निरन्तरता दिनाको विकल्प छैन भन्नुभयो ।
उहाँले अहिलेको व्यवस्थामा पाँच प्रतिशत दलाल, नोकरशाही र पुँजीपति वर्गको हातमा सत्ता रहेको बताउँदै आफूहरु ९५ प्रतिशत जनताको हातमा सत्ताको नेतृत्व होस् भन्ने पक्षमा रहेको धारणा राख्नुभयो ।
पुस्तकका लेखक गजुरेलले २००७ सालदेखि अहिलेसम्म भएका क्रान्ति किन र कसरी प्रतिक्रान्तिमा गएर टुङ्गिए भन्ने विषयलाई आफूले पुस्तकको प्रमुख विषय बनाएको जानकारी दिनुभयो ।
पुस्तकमाथि टिप्पणी गर्दै प्रगतिशील लेखक सङ्घका अध्यक्ष डा अमर गिरीले नेपालको कम्युनिस्ट आन्दोलन, जनयुद्ध, साम्राज्यवाद तथा नेपालमा जारी जातीय र क्षेत्रीय आन्दोलनका विषय बुझ्न पुस्तक उपयोगी हुने धारणा राख्नुभयो ।
प्रा डा जगदीशचन्द्र भण्डारीले एउटा उचाइमा पुगेको माओवादी आन्दोलन कसरी कमजोर बन्दै गएको भन्ने जानकारी पुस्तकबाट पाउन सकिने बताउनुभयो । साझा प्रकाशनका अध्यक्ष तथा महाप्रबन्धक डोलिन्द्रप्रसाद शर्माले समसामयिक समाज र राजनीति बुझ्न पुस्तक उपयोगी हुने विश्वास व्यक्त गर्नुभयो ।
अक्सफोर्ड इन्टरनेसनल पब्लिकेसन प्रालिले प्रकाशन गरेको पुस्तकमा विभिन्न विषयमा लेखिएका ६१ लेख सङ्ग्रृहीत छन् । रासस
No comments:
Post a Comment