केसमा उम्मेदवार घोषणा गर्नेहरु बढ्दै

काठमाडौँ, १८ फागुन । भ्रातृ एवम् शुभेच्छुक संस्थाका आवधिक समयमा महाधिवेशन हुन नसक्दा नेपाली काँगे्रसको १३औँ महाधिवेशनमा केन्द्रीय सदस्यको उम्मेदवारको सङ्ख्या बढ्ने भएको छ ।

दलको प्रमुख भ्रातृ संस्थाका रुपमा रहेका नेपाल विद्यार्थी सङ्घ, नेपाल तरुण दल र नेपाल महिला सङ्घ लगायतको महाधिवेशन पार्टी एकीकरणदेखि नै हुन सकेको छैन । पार्टीमा १३ भ्रातृ र १७ शुभेच्छुक संस्था छन् । पार्टी एकीकरणपछि नेपाल ट्रेड युनियन काँग्रेस, नेपाल दलित सङ्घ, नेपाल प्रेस युनियन र नेपाल शिक्षक सङ्घको मात्र महाधिवेशन भएको छ ।

भ्रातृ संस्थाको पदाधिकारी बन्न चाहनेले काँग्रेस केन्द्रीय सदस्यमा उम्मेद्वारी दिन चाहेकाले केन्द्रीय सदस्यका उम्मेदवार ५०० नाघ्न सक्ने कार्यकर्ताको विश्लेषण छ । नेविसङ्घका नेता आनन्द त्रिपाठी लामो समयदेखि विद्यार्थीको महाधिवेशन नभएकाले अध्यक्ष, उपाध्यक्ष, महामन्त्री लगायत पदमा उम्मेदवार बन्न चाहने नेताले काँग्रेस केन्द्रीय सदस्यमा उम्मेदवारी दिने तयारी सुरु गरेको बताउनुहुन्छ । “समयमै भ्रातृ संस्थाको महाधिवेशन गरिएको भए काँग्रेसको १३औँ महाधिवेशनमा केन्द्रीय सदस्य घोषणा गर्नेको यो रुपमा बाढी आउने थिएन, लोकतान्त्रिक दलमा लोकतान्त्रिक अभ्यास नहुँदा एकै पटक धेरैले उम्मेदवारी घोषणा गरे,” उहाँले भन्नुभयो ।

काँग्रेस विधानानुसार एक एक सभापति, महामन्त्री र कोषाध्यक्ष, खुला केन्द्रीय सदस्य २५ तथा सात प्रदेशबाट दुई जनाका दरले १४ केन्द्रीय सदस्य, आरक्षणअन्तर्गत महिलाबाट छ, दलित– आदिवासी जनजाति–मधेसीबाट पाँच पाँच र मुस्लिमबाट एक गरी ६४ जनाको निर्वाचन हुनेछ । बाँकी पदाधिकारीमध्ये एक एक उपसभापति र महामन्त्री तथा बाँकी केन्द्रीय सदस्य सभापतिले मनोनयन गरी केन्द्रीय कार्यसमितिले अनुमोदन गर्ने विधानमा व्यवस्था गरिएको छ । पदाधिकारी र केन्द्रीय सदस्य गरी केन्द्रीय कार्यसमितिमा कुल ८५ जना रहने छन् ।

केन्द्रीय सदस्यमा उम्मेदवारी घोषणा गर्नेले समेत सम्पर्क कार्यालय खोलेर महाधिवेशन प्रतिनिधिसँग भेटघाट एवम् प्रचारप्रसार गर्न थालेका छन् । राजधानीको व्यस्त भृकुटीमण्डप जहाँ यही फागुन २१ गतेदेखि काँग्रेस महाधिवेशनको बन्द सत्र हुँदैछ, मा जनजाति आरक्षणका केन्द्रीय सदस्यद्वय कर्माछिरिङ शेर्पा र दिलमान पाख्रिनले सम्पर्क कार्यालय खोल्नुभएको छ ।

उम्मेदवारको कार्यालय खुलेको वरपर जिल्ला जिल्लाबाट राजधानी भित्रिएका महाधिवेशन प्रतिनिधिको भिड लाग्न थालेको छ । कार्यालय वरपरको वातावरण हेर्दा नेता मत माग्न हिँड्नेभन्दा मत हाल्ने कार्यकर्ता नै नेता खोज्दै सम्पर्क कार्यालय धाउन थालेका छन् ।

काँग्रेस कावा सभापति एवम् १३औँ महाधिवेशनमा सभापतिका उम्मेदवार बन्न लाग्नुभएका रामचन्द्र पौडेलको अनामनगरस्थित सम्पर्क कार्यालय रहेको सामाजिक लोकतन्त्र अध्ययन केन्द्रको कार्यालय नजिकै केन्द्रीय सदस्य जीवन परियारले सम्पर्क कार्यालय खोल्नुभएको छ । महाधिवेशनमा सहकारी आन्दोलनका अग्रणी एवम् पूर्वगृह राज्यमन्त्री दीपकप्रकाश बाँस्कोटाले पनि केन्द्रीय सदस्यमा उम्मेदवारी घोषणा गर्नुभएको छ । नेपाल पत्रकार महासङ्घका पूर्वअध्यक्ष तारानाथ दाहाल पनि उम्मेदवारी घोषणा गरी प्रचारप्रसारमा लाग्नुभएको छ ।

काँग्रेस सिन्धुपाल्चोकको सभापति हुँदा तरुण दस्ता खोल्ने तयारी गरेर चर्चामा आउनुभएका मोहनबहादुर बस्नेतले केन्द्रीय सदस्यमा उम्मेदवारी घोषणा गर्दै नयाँ बानेश्वरमा सम्पर्क कार्यालय खोल्नुभएको छ । वरिष्ठ नेता एवम् सभापतिका उम्मेदवार बन्न लाग्नुभएका शेरबहादुर देउवाको सम्पर्क कार्यालय नजिकै रहेकाले बस्नेतको सम्पर्क कार्यालयमा प्रभावशाली नेताहरुको समेत भिड देखिन्छ ।

नयाँ बानेश्वर, बिजुली बजार, डिल्ली बजार, थापाथली, त्रिपुरेश्वर, गैह्रीधारा लगायत क्षेत्रमा खोलिएका काँग्रेस केन्द्रीय सदस्यका उम्मेदवारको सम्पर्क कार्यालय वरपर पनि दुर्गम जिल्लाका गाउँबाट आएका महाधिवेशन प्रतिनिधि एवम् पर्यवेक्षक कार्यकर्ताको चहलपहल छ । केन्द्रीय सदस्यमा उम्मेदवारी घोषणा गर्नेको लामसँगै काठमााडौँ उपत्यकाका चियापसलको बहस समेत काँग्रेस महाधिवेशनमा केन्द्रित हुन थालेको छ । सभापति, महामन्त्री, कोषाध्यक्ष एवम् केन्द्रीय सदस्यमा जितहारको विश्लेषणमा नेता, कार्यकर्ता, शुभेच्छुक र सर्वसाधारणले चासो दिइरहेका छन् ।

केन्द्रीय सदस्यका उम्मेदवार बन्न लाग्नुभएका पाख्रिन भ्रातृ संस्थाको महाधिवेशन नभएको र यस पटक पार्टीका क्रियाशील सदस्यको सङ्ख्या पनि बढेकाले केन्द्रीय सदस्यमा उम्मेदवारी घोषणा गर्नेको लर्को लागेको बताउनुहुन्छ । “क्रियाशील सदस्यको सङ्ख्याअनुसार केन्द्रीय सदस्य पनि बढाउने व्यवस्था गरिनुपथ्र्यो, त्यसो नहुँदा झन्डै दोब्बरको सङ्ख्यामा बढेका क्रियाशील सदस्यको सही प्रतिनिधित्व हुने देखिएन,” उहाँले भन्नुभयो ।

भ्रातृ संस्थाको केन्द्रीय सदस्य पद सम्हालिरहेकाहरुले समेत पार्टी केन्द्रीय सदस्यमा उम्मेदवारी घोषणा गरी जग हँसाएको काँग्रेस कार्यकर्ता श्याम रेग्मीले टिप्पणी गर्नुभयो । पूर्णप्रसाद मिश्र/रासस