सुदूरपश्चिमकै पहिलो प्याराग्लाइडिङ बैतडीमा हुने

बैतडी, १८ फागुन । सुदूरपश्चिमकै पहिलो प्याराग्लाइडिङ मध्यपहाडी लोकमार्गस्थित पश्चिमी सहर बैतडीको पाटनमा हुने भएको छ ।

पाटनलाई प्याराग्लाइडिङका लागि प्राविधिक टोलीले उपयुक्त ठहर गरेपछि केही हप्ताभित्र प्याराग्लाइडिङ सुरु हुने भएको हो ।

गत वर्ष नै प्याराग्लाइडिङको परीक्षण सफल भएपछि प्राविधिक टोली यसवर्ष पुनः पाटन पुगेर प्याराग्लाइडिङका लागि पहल सुरु गरेको छ । श्यामराज भट्ट, थर्कबहादुर शाह र मोहनराज भट्टराईलगायतको प्राविधिक टोलीले पाटनका चार ठाउँबाट प्याराग्लाइडिङका लागि उपयुक्त भएको ठहर गरेको छ ।

पाटन नगरपालिका वडा नं १२ को दहडाँडा, वडा नं २ को जरौलीडाँडा, वडा नं १३ को अन्नाडीडाँडा र वडा नं ११ को हुरहुरेडाँडाबाट प्याराग्लाइडिङ गर्न सकिने देखिएको टोलीले ठहर गरेको हो ।

सुरुमा डडेल्धुराबाट प्याराग्लाइडिङका लागि परीक्षण गरिएपनि हावाको एकोहोरो बहावका कारण सम्भव नदेखिएको प्राविधिक टोलीका सदस्य थर्कबहादुर शाहले बताउनुभयो । उहाँले भन्नुभयो – “पाटनमा हावाको गति र दिशा उपयुक्त रहेको छ ।”

त्यस्तै, पाटन नगरपालिका–१३ को भिटास्थित पोखरी नजिकमा कटेज खोल्ने तयारी स्थानीयवासीले थालेका छन् । पाटनभन्दा करिब आठ किमी पश्चिममा रहेको पात्तालभुमेश्वर गुफाको प्रवद्र्धन र प्याराग्लाइडिङलाई व्यावसायिकीकरण गर्न संस्थागत रुपमै प्रयास गर्ने पाटनका स्थानीयवासी युवा पुष्कर भण्डारीले बताउनुभयो । उहाँले भन्नुभयो – “पर्यटन प्रवद्र्धनका लागि संस्था दर्ता गरेर सामूहिक रुपमा अघि बढ्न प्रक्रिया सुरु गरिएको छ ।” रासस