काठमाडौँ, ५ फागुन । विपद् व्यवस्थापनमा लामो अनुभव सगाल्नुभएका पाकिस्तानका लेफ्टिनेन्ट जनरल नदीम अहमदले राष्ट्रिय पुनःनिर्माणको कामलाई छुट्टै प्रणालीअनुरुप अघि बढाइनुपर्ने बताउनुभएको छ ।
पाकिस्तानको भूकम्प पुनःनिर्माण र पुनःस्थापना प्राधिकरणका तत्कालीन उपाध्यक्षसमेत रहनुभएका अहमदले भूकम्पपछिको पुनःनिर्माण मन्त्रालयको निरन्तर कामका रुपमा लिन नहुने उल्लेख गर्नुभयो ।
राष्ट्रिय पुनःनिर्माण प्राधिकरणले आज सिंहदरबारमा आयोजना गरेको गोष्ठीमा उहाँले भन्नुभयो–“पुनःनिर्माणको काम सामान्य हैन तर सम्भव पनि छ, त्यसैले यसलाई निश्चित मन्त्रालयगत कामका रुपमा नभई भिन्न प्रकारले अघि बढाउनुपर्छ ।”
पुनःनिर्माणको कामलाई अघि बढाउँदा पहिला विशेष क्षेत्र (भूकम्प प्रभावित १४ जिल्लामध्ये तत्काल गरिनुपर्ने) निर्धारण गरी निश्चित समयसीमा तोकेर परियोजना अघि बढाउन सुझाउँदै सामान्य परियोजनाका लागि जिल्ला उहाँले सामान्य परियोजनालाई स्वायत्तता दिइनुपर्नेमा जोड दिनुभयो ।
पाकिस्तानको सेनामा ४० वर्ष लामो सेवा गर्नुभएका जनरल अहमदले विभिन्न अन्तर्राष्ट्रिय संस्थामा विपद् व्यवस्थापनसम्बन्धी काम गरिसक्नुभएको छ ।
राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीले भूकम्प, बाढीलगायत विभिन्न विपद् व्यवस्थापनमा पाकिस्तानले गरेका अनुभव आदानप्रदान गर्ने उद्देश्यले कार्यक्रम आयोजना गरिएको बताउनुभयो ।
नेपालले पुनःनिर्माण राष्ट्रिय महाअभियान सुरु गरेको सन्दर्भमा पाकिस्तानमा भूकम्पपछिको पुनःनिर्माणमा लामो अनुभव बटुलेका जनरल अहमदको अनुभवले नेपालको पुनःनिर्माणमा सान्दर्भिक हुने उहाँले उल्लेख गर्नुभयो ।
प्रमुख कार्यकारी अधिकृत ज्ञवालीले पुनःनिर्माण ऐन जारी भई, विभिन्न क्षेत्रमा काम सुरु भइसकेको र त्यसलाई थप व्यवस्थित र प्रभावकारी बनाउन प्राधिकरण लागेको पनि जानकारी दिनुभयो ।
कार्यक्रममा पुनःनिर्माणसम्बन्धी सरोकारवाला मन्त्रालयका सहसचिव एवम् विभागीय प्रमुखको सहभागिता थियो । रासस
No comments:
Post a Comment