भोजपुर, १ फागुन । उपप्रधानमन्त्री तथा रक्षामन्त्री भीम रावलले खाद्यान्नमा आत्मनिर्भर जिल्लाका रुपमा रहेको भोजपुरको विकास र संवद्र्धनमा सबैले श्रम र पसिना लगानी गर्नुपर्नेमा जोड दिनुभएको छ ।
भोजपुर जिल्लाको ऐतिहासिक टक्सार बजार स्थापनाको २०० वर्ष पुगेको अवसरमा आज आयोजित द्विसतवार्षिकी टक्सार महोत्सवको उद्घाटनसत्रमा बोल्नुहुँदै उहाँले बन्दुक र बारुदमा आफ्नो श्रम फाल्ने समय गएको भन्दै सबल र स्वाभिमानी नेपाल बनाउने सरकारको चाहना रहेको उद्घोष गर्नुभयो ।
त्यस्तै, कार्यक्रममा सरकारका प्रवक्ता एवम् सूचना तथा सञ्चारमन्त्री शेरधन राईले भोजपुरको टक्सारमा उत्पादित भाँडाकुँडा र हस्तकलाको व्यापारीकरण र विस्तार गर्नमा जोड दिनुभयो । उहाँले नेपाललाई समृद्ध बनाउने सरकारको दायित्व भएजस्तै टक्सारको पुनर्जीवनका लागि सबै मिलेर लाग्नुपर्ने बताउनुभयो ।
आगामी फागुन ८ गतेसम्म सञ्चालन हुने उक्त महोत्सवको मन्त्री रावलले पौने चारसय केजीको तामाबाट बनाइएको करुवाको स्तम्भ अनावरण गर्नुभएको थियो । महोत्सवमा सूचना तथा सञ्चारमन्त्री राईले २०० वर्ष अगाडि टक्सारमा काटिने गरेको ‘डोली’ पैसाको आकृति भएको स्तम्भको पनि उद्घाटन गर्नुभएको थियो ।
कार्यक्रममा विभिन्न जातजातिका झाँकी प्रदर्शनी, कृषि हस्तकला प्रदर्शनी, स्वास्थ्य शिविर सञ्चालनमा छन् भने महोत्सवमा गीतकार श्याम तमोटद्वारा रचित नेपाल भाषाको गीति एल्बम विमोचनसमेत गरिएकोे थियो । महोत्सवमा दर्शकको बाक्लो उपस्थिति रहेको थियो ।
टक्सार बजारलाई पर्यटन प्रवद्र्धन तथा दीर्घ विकास गर्नका लागि महोत्सवको आयोजना गरिएको द्विसतवार्षिकी टक्सार महोत्सवका अध्यक्ष गणेश बज्राचार्यले बताउनुभयो ।
No comments:
Post a Comment