भुजेललाई आर्थिक सहयोग

दोलखा, १७ फागुन । औषधि किन्ने रकम नभएपछि परिवारबाटै फलामे खोरमा थुनुवा जीवन व्यतित गर्दै आएका जुगु गाविस–५ निवासी ४० वर्षीय श्यामबहादुर भुजेललाई आर्थिक सहयोग प्राप्त भएको छ ।

‘फलामे खोरमा छोरा थुन्न सहकारीबाट ऋण’ शीर्षकमा राष्ट्रिय समाचार समिति ९रासस०बाट समाचार प्रकाशन भएपछि उहाँलाई आर्थिक सहयोग प्राप्त भएको हो । अति गरिबीका कारण औषधि किन्ने रकम नहुँदा मानसिक रोगी भुजेललाई आमाले सहकारीबाट ऋण लिएर फलामको खोर बनाई विगत १५ महिनादेखि थुन्नुभएको थियो ।

सो समाचार राससबाट प्रकाशन भएपछि वीरगन्ज उपमहानगरपालिका–१८ विसुवा नयाँवस्ती घर भई हाल अष्ट्रेलियामा बसोबास गर्दै आउनुभएका अमित रिजालले रु ५० हजार सहयोग गर्नुभएको हो । सहयोग रकम दोलखाका सांसद् पार्वत गुरुङ, प्रजिअ देवेन्द्र लामिछाने, स्थानीय विकास अधिकारी विष्णुप्रसाद शर्माले संयुक्त रुपमा बिरामीका आमा जगतमायालाई हस्तान्तरण गर्नुभयो । उक्त रकम राससका दोलखा प्रतिनिधि गोकर्णप्रसाद भण्डारीलाई अमितका बुबा ईन्द्रप्रसादले बैंकमार्फत पठाउनुभएको थियो ।

सहयोग रकम पाएपछि खुसी हुँदै जगतमायाले छोरालाई थुन्न फलामको खोर बनाउँदा लागेको खर्च तिर्ने र बाँकी रकम छोराको उपचारमा खर्च गरिने बताउनुभयो । यसैबीच, भुजेललाई कोसिस नेपाल नामक संस्थाले एक साताअघि उपचारको लागि राजधानी लगिसकेको छ । रासस ९तस्बिर उपलब्ध छ०