हेटौँडा, २८ माघ । उपप्रधान तथा रक्षामन्त्री भीमबहादुर रावलले नयाँ संविधानले शिक्षालाई मौलिक हकका रुपमा प्रत्याभूत गरेकाले राष्ट्रलाई आर्थिक समृद्धि गर्ने समयानुकूल शिक्षानीति आवश्यक रहेको बताउनुभएको छ ।
उहाँले नेपाल राष्ट्रिय शिक्षक सङ्गठनको १९औँ राष्ट्रिय परिषद् भेला (बैठक) को आज हेटौँडामा उद्घाटन गर्दै सामाजिक सद्भावसहित व्यवस्थापन हुने मुलुकको सङ्घीयतामा सबै नेपालीको वेषभूषा र संस्कृति फस्टाउन सक्ने छ, भन्नुभयो ।
उपप्रधानमन्त्री रावलले शिक्षालाई राजनीतिक करणबाट मुक्त तुल्याउँदै विकासको पूर्वाधार निर्माण गर्ने दक्ष जनशक्ति तथा प्राज्ञिकहरुको उत्पादन गर्ने कार्यमा शिक्षकको भूमिका पारदर्शी र जिम्मेवार हुनुपर्दछ भन्नुभयो ।
सो समारोहमा शिक्षामन्त्री गिरीराजमणि पोखरेलले राष्ट्रिय स्वतन्त्रतालाई आत्मसात् गर्ने, परोपकारी स्वावलम्बी बनाउने शिक्षानीतिलाई सरकारले उच्च प्राथमिकताका साथ कार्यान्वयन गर्न निकट भविश्यमा बृहत् सम्मेलन आयोजना गरी अघि बढ्ने बताउनुभयो ।
उहाँले शिक्षकको प्राज्ञिक मर्यादाभित्र रहेर आआफ्नो वर्गीय हितका लागि कार्य गर्नुपर्ने र शिक्षकको बृहत् हितका लागि गुरुयोजना तयार गरी कार्यान्वय गर्न सरकार क्रियाशील रहेको छ भन्नुभयो ।
कार्यक्रममा उपप्रधानमन्त्री रावलले हास्यकलाकारद्वय मदनकृष्ण श्रेष्ठ, हरिवंश आचार्यलाई दोसल्ला ओढाइ सम्मान गर्नुभयो ।
यसैगरी उहाँले अगुवा शिक्षकहरु बद्रीप्रसाद खतिवडा, दीपक श्रेष्ठ, बिन्दु गोर्खाली, धर्मदत्त न्यौपाने र गिरीबहादुर सुवेदीलाई पनि दोसल्ला ओढाइ सम्मान गर्नुभयो ।
भोलिसम्म सञ्चालन हुने शिक्षक परिषद् भेलामा नेपाल राष्ट्रिय शिक्षक सङ्गठनका केन्द्रीय समिति र ७५ जिल्ला शाखाका प्रतिनिधि र पर्यवेक्षक गरी ३७५ जना शिक्षकको सहभागिता रहेको नेपाल राष्ट्रिय शिक्षक सङ्गठनका केन्द्रीय अध्यक्ष बाबुराम थापाले जानकारी दिनु भयो । रासस
No comments:
Post a Comment