चन्दा आतङ्कको व्यवसायीद्वारा आपत्ति

नेपालगन्ज, ३ फागुन । पाँच महिना लामो मधेस आन्दोलनले थिलथिलो बनेका बाँके जिल्लाका उद्योगी र व्यवसायीले चन्दा आतङ्कको सामना गर्नुपरेको दुःखेसो पोखेका छन् ।

गत वैशाखको भूकम्प, त्यसपछिको मधेस आन्दोलन र पाँच महिना लामो नाकाबन्दीबाट निजी क्षेत्र तङ्ग्रिन नपाउँदै सुरु भएको चन्दा आतङ्कले आफूहरुलाई परेकोे घाउमा नुन छर्ने काम भएको जिल्लाका उद्योगी र व्यवसायीको भनाइ छ ।

नेकपा माओवादी विप्लव समूहले जिल्लाका उद्योगी र व्यवसायीसँग चन्दा मागेर आतङ्क मच्चाउन थालेको भन्दै नेपालगन्ज उद्योग वाणिज्य सङ्घले आप्mनो गम्भीर ध्यानाकर्षण भएको जनाएको छ ।

सङ्घका अध्यक्ष कृष्णप्रसाद श्रेष्ठद्वारा जारी विज्ञप्तिमा भनिएको छ – “जनआन्दोलन, मधेस आन्दोलन एवम् विभिन्न जाति, समुदाय र पार्टीको आन्दोलनमा सबैभन्दा बढी उद्योग, व्यवसाय क्षेत्रले नै ठूलो नोक्सानी र क्षति व्यहोर्नु प¥यो ।”

“संविधान जारी भएर राजनीतिक स्थायित्व र शान्तिको बाटोतर्फ अग्रसर हुँदै अब समृद्धिको यात्रामा लाग्नुपर्ने बेलामा विप्लव समूहले चन्दा मागेर आतङ्क सिर्जना गर्न खोजेको घटनाप्रति हाम्रो गम्भीर ध्यानाकर्षण भएको छ”– विज्ञप्तिमा उल्लेख छ ।

“चन्दा स्वेच्छिक हुनुपर्छ, रकम तोकेर चन्दा माग्नु र त्यसमाथि दबाबमूलक भाषा प्रयोग गर्नु गम्भीर आपत्तिको विषय हो”– विज्ञप्तिमा भनिएको छ ।

विभिन्न बहानामा चन्दा माग्ने जुनसुकै सङ्गठन र राजनीतिक दललाई त्यसो नगर्न नेपालगन्ज उद्योग वाणिज्य सङ्घले विज्ञप्तिमार्पmत आग्रह गरेको छ । रासस