काँग्रेस परिवर्तनको नेतृत्व गर्न सफल

काठमाडौँ, २० फागुन । नेपाली काँग्रेसका महामन्त्री प्रकाशमान सिंहले पार्टी प्रतिकूल अवस्थामा पनि सिद्धान्त र आदर्शप्रति प्रतिबद्ध रहेकाले ठूला परिवर्तनको नेतृत्व गर्न सफल भएको बताउनुभएको छ ।

नेपाली काँग्रेस १३औँ महाधिवेशन उद्घाटन समारोहलाई आज सम्बोधन गर्दै उहाँले भन्नुभयो, “यो महाधिवेशनले समयको हाँकलाई लैजान सक्ने पार्टीको नीति र कार्यक्रम बनाउनुपर्छ, संस्थापक नेताको नाम भजाएरमात्र जनताले काँग्रेसलाई पत्याउँदैनन् ।”

राजनीतिक परिवर्तनलाई दीर्घकालीन बनाउन देशको साधन र स्रोतलाई उपयोग गरेर आर्थिक क्रान्ति गरिनुपर्नेमा उहाँको जोड थियो । विसं २०४६ को परिवर्तनपछि आन्दोलनका कमाण्डर गणेशमान सिंहले पनि खुलामञ्चबाटै आर्थिक क्रान्तिबाट जनताको जीवनस्तर सुध्रिएमात्र परिवर्तनले संस्थागत रुप लिनसक्ने बताउनुभएको थियो । उखान टुक्काले देशका समस्या समाधान हुन नसक्ने प्रमाणित भएकाले मुलुक चलाउन सक्ने नीति महाधिवेशनले निर्माण गर्ने महामन्त्री सिंहको भनाइ थियो ।

अर्का महामन्त्री कृष्णप्रसाद सिटौलाले चुनौतीपूर्ण अवस्थाबाट मुलुक गुज्रिएकाले त्यसको सामना गर्ने नीति निर्माण गर्न महाधिवेशन सफल हुने विश्वास व्यक्त गर्नुभयो । उहाँले भन्नुभयो, “गिरिजाप्रसाद कोइरालाको कार्यदिशाबाट दिगो शान्ति र सुशील कोइरालाको कार्यदिशाबाट देशले संविधान पाएकाले त्यसलाई संस्थागत गर्ने कार्यदिशा यो महाधिवेशनले पारित गर्नुपर्छ ।”

सङ्कीर्ण चित्तले नेपाल बन्न नसक्ने भएकाले सबै मिलेर जाने गरी नीति निर्माण गरिनुपर्ने उहाँको भनाइ थियो । “पार्टीको सोच र शैलीलाई समीक्षा गर्ने दिन आएको छ, यी विषयमा महाधिवेशनले मूल्याङ्कन गर्न सक्नुपर्छ”– उहाँले भन्नुभयो । रासस