न्यूनचापीय क्षेत्रको विकासले मौसममा खराबी

काठमाडौँ, १८ चैत । देशको मध्य र पूर्वी भागको उच्च वायुमण्डलमा न्यूनचापीय क्षेत्रको विकासका कारण मौसममा खराबी आएको छ ।

उच्च वायुमण्डलमाथि एउटा न्यूनचापीय मौसमी प्रणाली बसेका कारण मध्यपूर्वी र मध्य क्षेत्रमा पानी परेको मौसम पूर्वानुमान महाशाखाले जनाएको छ ।

पूर्वी र मध्यपहाडी क्षेत्रमा मेघगर्जनसहित वर्षा भएको र यस न्यूनचापीय मौसमी प्रणालीको प्रभाव पूर्वी र मध्य नेपालमा आज रातभर रहनसक्ने महाशाखाद्वारा जारी विज्ञप्तिमा उल्लेख छ ।

महाशाखाको विवरणअनुसार आज काठमाडौँमा ३.८, पोखरामा ३.३, भैरहवामा ४.२, ओखलढुङ्गामा ४.१, विराटनगरमा ३०.९, ताप्लेजुङ्गमा १.० मिलिमिटर वर्षा भएको छ । सबैभन्दा बढी कास्कीको लुम्लेमा ४६.० मिलिमिटर र सबैभन्दा कम धनकुटामा ०.१ मिलिमिटर वर्षा भएको छ ।

न्यूनचापीय प्रणालीको प्रभावले चट्याङ गराउने खालको बादल विकास गराएको र मध्य र पूर्वका पहाडी भेगमा मेघ गर्जनसहित वर्षा र हावाहुरी चलेको मौसमविद् सुवास रिमालले जानकारी दिनुभयो ।

यस्तै दशको पश्चिमी पहाडी क्षेत्रमा पनि स्थानीय जलवास्पयुक्त हावा सक्रिय हुँदा मौसममा खराबी आएको मौसम पूर्वानुमान महाशाखाले जनाएको छ । उपत्यकामा साँझसम्म सुधार आउने र पूर्वी भेगमा भने यो प्रणाली केही दिन जारी रहने मौसमविद् रिमालले बताउनुभयो । उहाँका अनुसार पश्चिमी भेगबाट पुनःअर्को प्रणाली विकास भएकाले शुक्रबार पश्चिमी क्षेत्रमा बदली हुनेछ ।

प्रिमनसुनको अवस्थामा मेघ गर्जनसहित वर्षा र हावाहुरी चल्नु सामान्य भएको मौसमविद्को भनाइ छ । आज काठमाडौँ उपत्यकाको अधिकतम् तापक्रम २६.८ र न्यूनतम् तापक्रम १२.५ डिग्रिसेल्सियस रहेको महाशाखाले जनाएको छ । रासस