जीवनभर जिब्रो छेड्ने जुजुभाइको घोषणा

भक्तपुर, १६ चैत । सातौँ पटक जिब्रो छेडिसकेका बोडेका ३५ वर्षीय जुजुभाइ वासँ श्रेष्ठले संस्कृति जोगाई राख्न जीवनभर जिब्रो छेड्ने घोषणा गर्नुभएको छ ।

थिमिमा आज आयोजित पत्रकार सम्मेलनमा उहाँले आफ्नो शरीर र स्वास्थ्यले साथ दिएसम्म, अरु व्यक्ति जिब्रो छेड्न तयार भएर नआएसम्म र बोडेका बासिन्दाको सहयोग रहेसम्म जात्रालाई निरन्तरता दिन आफूले जिब्रो छेड्ने बताउनुभयो ।

हरेक वर्ष अब कसले जिब्रो छेड्ला भन्ने स्थानीयको आशङ्का तोड्दै उहाँले यसवर्ष आठाँैपटक जिब्रो छेड्न लागेको बताउनुभयो । जिब्रो छेड्ने जात्राको लागि आज च्वाङ्गा गणेशमा पूजा एवम् साइत गरी प्रसाद ग्रहण गरेर देवताको रुपमा प्रसादलाई घरमा राखी यसवर्षको जात्राको प्रक्रिया सुरु गरेको बताउनुभयो ।

परापूर्वकालमा यो जात्रा सञ्चालनमा आएपछि बोडेमा महाभूकम्प नजान, यहाँका बासिन्दाले कुनै कुरामा दुःख नपाउने, बोडेमा रोग, अनिकाल, अनावृष्टि, अतिवृष्टि, नहुने र धर्मको चेष्टा बढाउने जनविश्वसालाई गत वैशाख १२ गतेको भूकम्पले यहाँ कुनै क्षति नपु¥याएपछि प्रमाणित गरेको बताउँदै श्रेष्ठले अब हरेक वर्ष आफैँले जिब्रो छेड्ने घोषणा गरेको बताउनुभयो ।

वैशाख २ गते बिहानैदेखि जिब्रो छेड्नेकर्मी नाइकेले विभिन्न देवगणको पूजा गरी जिब्रो छेड्न पाँचो गणेशको प्राङ्गण रहेको पाटीमा मञ्च बनाई नायखिँ बाजाका साथ जिब्रो छेड्ने परम्परा छ ।

नकर्मीले एक महिनादेखि लामो सुइरो बनाई तेलमा डुबाएर राखेको हुन्छ र त्यही सुइरो ल्याएर सबै देवगणको पूजा गरी जिब्रो छेड्ने व्यक्तिलाई नायखिँ बाजा बजाउंँदै ल्याएपछि मञ्चमा राखी सबैको अगाडि जिब्रो छेडिन्छ । बाँस एवम् निगालोले बनेको अर्धचन्द्राकार महाद्वीप (भ्यय) बालेर जिब्रो छेड्ने व्यक्तिलाइृ बोकाई विभिन्न टोलटोलमा घुमाइन्छ ।

टोलटोल घुमाई पाँचोगणेशको रथलाई भागुटोल पु¥याएपछि नकर्मी नाइकेले जिब्रोमा रहेको सियो निकाली महालक्ष्मीको माटो जिब्रोको प्वालमा राखिदिन्छन् र सियो गणेश मन्दिरमा ठोकिदिन्छन् । त्यसपछि जिब्रो छ्ेड्ने व्यक्तिले नाट्यम्बरको पूजा गरेपछि मात्र बोल्न, खान र छुन हुने परम्परा छ । यो जात्रा विश्व प्रसिद्ध जात्रा पनि हो । रासस