रेविजविरुद्धको खोप लगाउने बढे

काठमाडौँ, १४ चैत । जनावरले टोकेपछि शुक्रराज ट्रपिकल तथा सरुवा रोग अस्पताल टेकुमा रेविजको खोप लगाउन आउने बिरामी बढेका छन् ।

दैनिक सयभन्दा बढी नयाँ बिरामी खोपका लागि आउने गरेको अस्पताल सिनियर अहेब रेणुका आचार्यले बताउनुभयो । उहाँका अनुसार नयाँ पुराना गरी खोपका लागि दैनिक २०० भन्दा बढी बिरामी टेकु अस्पताल आउने गरेका छन् ।

रेविजविरुद्धको खोप नलगाएका कुकुर, बिरालो, मुसालगायतका जनावरको टोकेका खोप लगाउनु पर्दछ । पाँचपटक गरी खोप लगाउनुपर्ने अस्पतालका चिकित्सक डा शेरबहादुर पुनले बताउनुभयो ।

उहाँले भन्नुभयो– “जनावरले टोकेमा पहिलो दिन, तेस्रो दिन, सातौँ दिन, चौथो दिन र २८औँ दिनमा गरी पाँचपटक खोप लगाउनुपर्छ ।” यदि घरमै पालेको जनावरले टोकेमा पहिलो दिन, तेस्रो दिन र सातौँ दिन गरी तीनपटक खोप लगाएमा रेविज हुनबाट बच्न सकिने पुनले जानकारी दिनुभयो ।

जनावरले टोकेका बिरामीमध्ये धेरै बिरामी कुकुरले टोकेका आउने गरेको डा पुनले बताउनुभयो । गएको एक सातामा एक हजार ४४४ जना बिरामीले रेविजविरुद्धको खोप लगाएका छन् । रासस