उर्लाबारी (मोरङ), ३० फागुन । सूचना तथा सञ्चारमन्त्री शेरधन राईले संविधान कार्यान्वयन गर्ने बेलामा नेपाली काँग्रेस पन्छिन नहुने बताउनुभएको छ ।
संविधान जारी भएसँगै मुलुकले ठूलो सङ्कट बेहोर्नु परेका बेला काँग्रेसले नेपाली जनतालाई धोका दिएको आरोप लगाउँदै मन्त्री राईले अब वर्तमान सरकारमा सहभागी भएर आफूले गरेको गल्ती सुधार गर्ने मौका रहेको बताउनुभयो ।
मोरङको सुन्दरदुलारी–७ स्थित साजिलाल उच्च माविको स्वर्ण जयन्ती समारोहलाई आज सम्बोधन गर्दै सञ्चारमन्त्री राईले काँग्रेसको महाधिवेशन एउटा नियमित प्रक्रियामात्र भएको बताउँदै महाधिवेशनपछि सरकार परिवर्तन हुने हल्ला केबल हल्लामा मात्र सीमित हुने बताउनुभयो ।
नेपाल सरकारका प्रवक्तासमेत रहनुभएका राईले प्रधानमन्त्री केपी ओलीको आगामी साता हुने चीन भ्रमणमा महत्वपूर्ण सम्झौता हुने जानकारी दिनुभयो । प्रधानमन्त्रीको चीन भ्रमणका क्रममा नयाँ ढङ्गबाट पारवहन, वाणिज्य र इन्धन आयातको दीर्घकालीन सम्झौता हुने पनि उहाँले बताउनुभयो ।
वर्तमान सरकार कुनै अनुचित सत्ताको खेलबाट निर्माण नभएको बताउँदै मन्त्री राईले संविधानको कार्यान्वयन, स्थानीय निकायको निर्वाचन, प्रदेशको सीमाङ्कन, प्रदेश सभाको निर्वाचनजस्ता ऐतिहासिक जिम्मेवारी वर्तमान सरकारको काँधमा रहेको बताउनुभयो ।
वर्तमान सरकारप्रति नेपाली जनताको ठूलो आशा र भरोसा रहेको उल्लेख गर्दै मन्त्री राईले प्रधानमन्त्रीले घोषणा गरेको विद्युत्भार कटौतीको अन्त्य र देशभरमा रहेका तुइन हटाउने कार्यलाई सरकारले महत्वका साथ लिँदै काम गरिरहेको बताउनुभयो ।
विगतमा देशमा भएको अस्थिर राजनीतिका कारण शिक्षा क्षेत्रमा परिवर्तन हुन नसकेको बताउँदै मन्त्री राईले अबको शिक्षा वैज्ञानिक र व्यवहारिक हुनुपर्नेमा जोड दिनुभयो । रासस
No comments:
Post a Comment