काठमाडौँ, ३ चैत । सशस्त्र प्रहरी बल नेपालले सङ्गठनको सूचनामा सर्वसाधारणको पहुँचलाई विस्तार गर्न सूचना दिन तोकिएका आफ्ना अधिकृतको नाम, सम्पर्क नम्बर र तस्बिरसहितको साइन बोर्ड बलका सम्पूर्ण स्थायी इकाइमा देखिने गरी टाँस्न सुरु गरेको छ ।
सशस्त्र प्रहरी बलको सूचना अधिकारी तथा प्रवक्ता, सहायक सूचना अधिकारी तथा सहायक प्रवक्तालगायत सम्बन्धित एपिएफ इकाइका सूचना अधिकारीको सम्पर्क नम्बरसहितको उक्त साइनबोर्ड यसै चैत महिनाको १५ गतेभित्र सम्पूर्ण कार्यालयमा राखिने बलले जनाएको छ ।
यसै क्रममा सशस्त्र प्रहरी बल प्रधान कार्यालयमा सर्वसाधारणले सजिलै प्रवेश पाउने सोधपुछ कक्षमा चार फिट चौडाइ तथा करिब साढे दुई फिट उचाइको साइनबोर्ड राखेको छ । साइनबोर्डमा सशस्त्र प्रहरी बलको प्रवक्ता तथा सूचना अधिकारी शैलेन्द्र खनालको सम्पर्क नम्बरलगायत बलका सहायक प्रवक्ता तथा सहायक सूचना अधिकारीको सम्पर्क नम्बरसहितको विवरण उल्लेख छ ।
छिटोछरितो ढङ्गले आफ्ना सूचना प्रवाह गर्दै आएको सशस्त्र प्रहरी बलले आफ्नो सङ्गठनका बारेमा सर्वसाधारणले सहज ढङ्गले सूचना प्राप्त गर्न सकोस् भनी यो नयाँ व्यवस्था गरेको हो ।
सशस्त्र प्रहरी बलले महानगरीय सशस्त्र प्रहरी कार्यालयलगायत सशस्त्र प्रहरी बलको बाहिनी, प्रशिक्षण संस्था तथा गण, सीमा सुरक्षा कार्यालय, गुल्मलगायतका एपिएफ इकाइ सबै ठाउँमा सो कार्यालयमा आउने जोसुकैले पनि सजिलैसँग देख्न सक्नेगरी साइनबोर्ड राख्ने कार्य भइरहेको छ ।
सूचनामा सर्वसाधारणको पहुँचलाई विस्तार गर्ने र नागरिकले बलका बारेमा अझै सहज ढङ्गले सूचना प्राप्त गर्नसक्ने विश्वास सशस्त्र प्रहरी बलले लिएको छ ।
बलले यसअघि नै आफ्ना सम्पूर्ण स्थायी इकाइमा दोस्रो बरियताका अधिकृतलाई सूचना अधिकारी तोक्नुका साथै अन्य सम्पूर्ण साना इकाइमा कार्यालय प्रमुख स्वयम् नै सूचना अधिकारी रहने व्यवस्था गरिसकेको छ ।
लागुऔषधसहित दुई पक्राउ
काठमाडौँ, गौशालाबाट अवैध तथा नियन्त्रित लागुऔषधसहित दुई जनालाई प्रहरीको लागुऔषध नियन्त्रण ब्युरोले मङ्गलबार पक्राउ गरेको छ ।
पक्राउ पर्नेमा काठमाडौँ महानगरपालिका बत्तीसपुतली घर भएका ४६ वर्षीय सुरजविक्रम राणा र काठमाडौँ गुह्ेश्वरी बस्ने पर्सा वीरगन्ज घर भएका ३० वर्षीय सञ्जय दत्त रहेका छन् ।
उनीहरुका साथबाट नियन्त्रित लागुऔषध बुप्रेनोर्फिन ५८० एम्पुल, डाइजेपाम ५६४ एम्पुल, फेनारगन ५६४ एम्पुल प्रहरीले बरामद गरेको छ ।
उनीहरुका सम्बन्धमा लागुऔषध नियन्त्रण ऐन, २०३३ अनुसार मुद्दा दर्ता गरी आवश्यक अनुसन्धान कार्य भइरहेको ब्युरोले जनाएको छ ।
ग्यास डिपोमा सिलबन्दी
काठमाडौँ नरदेवीस्थित बद्री मानन्धरको नेपाल ग्यास डिपोमा वाणिज्य तथा आपूर्ति व्यवस्थापन विभाग र महानगरीय प्रहरी वृत्त जनसेवाको टोलीले आज सिलबन्दी गरेको छ ।
डिपोमा चैत १ गते ग्यास सिलिन्ड ल्याएकामा उपभोक्तालाई वितरण नगरेको भन्ने गोप्य सूचनाका आधारमा खटिएको टोलीले अनुगमन गर्ने क्रममा वितरण नगरिएका नेपाल ग्यासका २० थान र श्रीकृष्ण ग्यासका १२ थान सिलिन्डर फेला पारेपछि सिलबन्दी गरी सञ्चालकलाई आपूर्ति व्यवस्थापन विभागमा उपस्थितिका लागि पुर्जी दिएको छ । रासस
No comments:
Post a Comment