फोहोर व्यवस्थापन नगर्दा समस्या

मेलम्ची, १७ चैत । मेलम्ची नगरपालिकाबाट सङ्कलित फोहोरमैलाको उचित व्यवस्थापन नगर्दा समस्या भएको छ । सिन्धुपाल्चोक जिल्लाको मेलम्ची नगरबाट सङ्कलन भएको फोहोरको व्यवस्थापन राम्रो नभएकोमा स्थानीयवासीले गुनासो गरेका छन् ।

नगरबाट सङ्कलन भएको फोहोर जथाभावी नदी किनारमा डम्पिङ गर्दा वातावरण मात्र प्रदूषित भएको छैन यसको दीर्घकालीन असरसमेत पर्ने गरेको छ । फोहोरको उचित व्यवस्थापनमा नगरपालिकाको सक्रियता नदेखिएकाले फोहोरबाट फैलिने आउँ, हैजा, पखालाजस्ता विभिन्न किसिमका रोगले व्याप्त हुने सम्भावना देखिएकाले छिटोभन्दा छिटो फोहोर व्यवस्थापनमा लाग्नुपर्ने नगर बासिन्दा चित्रकुमार श्रेष्ठले बताउनुभयो ।

फोहोर व्यवस्थापन उपसमिति गठन हँुदासमेत फोहोर व्यवस्थापनमा नगरपालिकाले कुनै अधिकार नदिएकाले व्यवस्थापनमा ढिलाइ भएकोे फोहोरमैला उपसमितिका एक अधिकारीले जानकारी दिनुभयो । डम्पिङ साइटको अभाव भएको र उचित डम्पिङ क्षेत्रका लागि नगरपालिकाले आफ्नो सक्रियता बढाउनुपर्ने देखिन्छ । कुहिने र नकुहिने फोहोर एकै ठाउँमा डम्पिङ गरेकाले कुहिने फोहोरसमेत कुहिन नसक्ने र उचित डम्पिङ क्षेत्रको अवलोकन हुँदै गर्दा सङ्कलित फोहोरलाई खाल्डो खनेर व्यवस्थापन गर्नुपर्नेमा स्थानीयवासीले जोड दिएका छन् ।

यस विषयमा मेलम्ची नगरपालिकाका कार्यकारी अधिकृत पूर्णप्रसाद दुलालले सरकारी कार्य भएकाले विभिन्न नीति र नियमसङ्गत ढङ्गले जानुपर्ने भएकाले केही समय लाग्ने बताउनुभयोे ।

फोहोर व्यवस्थापनका लागि डम्पिङ साइटको उचित क्षेत्रको तय नभएसम्म तत्कालका लागि दुईवटा खाल्डो खनेर कुहिने र नकुहिने फोहोरलाई छुट्टाछुट्टै खाल्डोमा हाल्ने दुलालले जानकारी दिनुभयो । नगरपालिकाले तोकेको क्षेत्रबाहेक अन्य सार्वजनिकस्थल तथा नदी किनारमा फोहोर फाल्नेलाई कडा कारबाहीका साथ दण्डजरिवानासमेत गरिने नगरपालिकाले जनाएको छ । रासस