नेपाल–भारत सम्बन्ध आत्मीय : राजदूत राय

पाल्पा, १७ चैत । भारतीय राजदूत रणजित रायले नेपाल–भारतको सम्बन्ध आत्मीय रहेको बताउनुभएको छ ।

पाल्पा उद्योग वाणिज्य सङ्घ पाल्पाले मङ्गलबार साँझ यहाँ आयोजना गरेको स्वागत कार्यक्रममा उहाँले नेपाल र भारतबीच केही खटपट हुनु सामान्य भएको बताउनुभएको छ । वार्ता र सहमतिबाट समस्या समाधान हुने उहाँले बताउनुभएको छ ।

नेपालमा विकासको फड्को मार्न भारत सरकारले नेपालको शिक्षा, स्वास्थ्य क्षेत्रमा ठूलो लगानी गरेको बताउनुभयो । रु पाँच करोडसम्मको भारतीय दूतावासले सिधै लगानी गर्न सक्ने भएकाले प्याकेजमा कार्यक्रम बनाउन उहाँले अनुरोध गर्नुभएको छ ।

भारतले दक्षिण एसियाको नै विकास गर्न चाहेको उहाँले बताउनुभएको छ । भारतले विकासको राजनीति गरेको पनि उहाँले बताउनुभयो । उहाँले शिक्षित र दक्ष जनशक्ति नेपालले उत्पादन गर्न सकेको अवस्थामा नेपाली बेरोजगार नहुनुपर्ने बताउनुभयो ।

कार्यक्रममा पाल्पाको विकासका लागि धेरै सम्भावना रहेको र त्यसका लागि भारत सरकारको सहयोग रहने पनि उहाँले बताउनुभयो ।

पूर्वमन्त्री माधव घिमिरेले प्रधानमन्त्री केपी शर्मा ओलीको भारत भ्रमणपछि नेपाल–भारतको सम्बन्ध फराकिलो बनाउन नयाँ काम सुरु भएको बताउनुभएको छ । उहाँले नेपाल–भारत मिलेर दुवै देशको विकास गर्न सकिने धारणा राख्नुभयो ।

पाल्पाको पर्यटन विकासका लागि सिद्धबाबा क्षेत्रको सडक सुधार गर्नुपर्ने धारणा उहाँले राख्नुभएको थियो । नेपाल सरकारले यस सिद्धार्थ राजमार्गको निर्माणका लागि भारत सरकारलाई अनुरोध गरेमा भारत सरकारको प्राथमिकतामा पर्ने आशा उहाँले व्यक्त गर्नुभयो । यसैबीच, रायले जिल्लाका राजनीतिक दलका प्रमुख, व्यवसायीलाई समेत सामूहिक रुपमा भेट्नुभएको थियो । रासस