नेपालगन्ज, २२ फागुन । एकीकृत नेकपा (माओवादी)का अध्यक्ष पुष्पकमल दाहालले नेपाली काँग्रेससहितको राष्ट्रिय सहमतिको सरकार गठन हुने सम्भावना अझै नटरेको बताउनुभएको छ ।
क्रान्तिकारी पत्रकार सङ्घ, बाँकेद्वारा आज यहाँ आयोजित पत्रकार सम्मेलनमा उहाँले भन्नुभयो – “नेपाली काँग्रेसको महाधिवेशन सकिएपछि यो विषयमा पुनः छलफल हुन्छ ।”
पत्रकारद्वारा सोधिएको एक प्रश्नको जवाफमा उहाँले नेपालको संविधानलाई भारत सरकारले अझै पूर्णरुपमा स्वागत गरिनसकेको जस्तो देखिएपनि प्रधानमन्त्रीको भारत भ्रमणले भने दुई देशबीचको सम्बन्ध सकारात्मक रुपमा अघि बढिरहेको देखिन्छ ।
अध्यक्ष दाहालको थप भनाइ थियो – “मधेसी मोर्चाका दुई महत्वपूर्ण माग संविधान संशोधनबाट पूरा भइसकेका र सीमाङ्कनसम्बन्धी माग पनि तीन महिनाभित्र टुङ्गोमा पु¥याइनेछ ।”
आफ्नो दल र फुटेका माओवादी दलबीच एकीकरणको प्रयास सकारात्मक रुपमा अघि बढिरहेको बताउँदै उहाँले निकट भविष्यमा माओवादी पार्टी पुनः एक भएर आउनेछ भन्नुभयो ।
यसैबीच, सो दलद्वारा आज यहाँ आयोजित नागरिक अन्तक्र्रिया कार्यक्रममा अध्यक्ष दाहालले सरकार बनाउने र गिराउने खेलमा आफ्नो पार्टी नलाग्ने स्पष्ट पार्नुभएको छ ।
संविधान कार्यान्वयन र भूकम्पपछि मुलुकको संरचना पुनःनिर्माणका लागि सबै राजनीतिक शक्तिबीच एकता अपरिहार्य छ भन्दै उहाँले संविधानले कसैलाई पनि विभेद नगरेकाले अधिकार नपाएको भ्रममा नपर्न पनि आग्रह गर्नुभयो । रासस
No comments:
Post a Comment