चट्याङले पाँच घाइते

धनकुटा १९ वैशाख । शनिबार राति हावाहुरी र वर्षासँगै परेको चट्याङ लागेर पाँच जना घाइते भएका छन् ।
चट्याङका कारण करेन्ट चुहिई कुखुरा फर्ममा आगलागी भएको छ भने हुरीले एउटा घरको छानो उडाएको छ ।

हावाहुरी र वर्षासँगै परेको चट्याङ लागेर डाँडाबजार–७ का मोहन खपाङगी, भरतकुमारी बजगाइँ, शर्मिला लिम्बू, कोपिला विश्वकर्मा र छ वर्षीय असिम विश्वकर्मा घाइते भएको प्रहरीले जनाएको छ ।

घाइतेलाई उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लगिएको छ ।
डाँडाबजार– ७ लुङ्फाजुङका टङ्क मगरको कुखुरा फर्म रहेको दुई तले घरमा आगलागी हुँदा ९०० बोइलर कुखुरासहित अन्य सामग्री जलेर नष्ट हुँदा करिब पाँच लाख बराबरको क्षति भएको प्रहरी प्रवक्ता विमल बस्तेतले जानकारी दिनुभयो ।

यता हावाहुरीले धनकुटा बजारस्थित भीमनारायण चोकका सत्यनारायण श्रेष्ठको घरको जस्ता पाताको छानो उडाएको छ । हुरीले उडाएको घरको छानोले विद्युत्को लाइनमा क्षति पु¥याएपछि यहाँ रातभर विद्युत् अवरुद्ध भएको थियो । रासस